«Muž šapnuŭ: «Heta KDB». Jak zatrymlivajuć biełarusaŭ za kamientary
Alaksiej Siańko — 36-hadovy rabočy sa Słonima. Uviečary 29 vieraśnia pa jaho pryjšli z Kamiteta dziaržbiaśpieki, paśla ŭ kvatery prajšoŭ pieratrus.
30.09.2021 / 14:28
«Mužu było kiepska, jon zastaŭsia doma, ja z małym synam pajšła ŭ kramu. Zajšli da babuli, maci muža, jakaja žyvie pobač. Pakul byli ŭ jaje, u dźviery pazvanili troje nieviadomych z kamiennymi tvarami, pytajucca pra Alaksieja.
Nie pradstaŭlalisia, ničoha nie kazali. Stała tryvožna, — raskazvaje jaho žonka «Našaj Nivie». — Ja pazvaniła mužu, jon spačatku nie braŭ, paśla kaža: «Nie mahu razmaŭlać». My pajšli dadomu, padychodzim, a tam tyja troje jaho ŭžo vyvodziać. Jon paśpieŭ mnie šapnuć: «Heta KDB».
Mnie ničoha tady nie skazali. Uviečary muž pazvaniŭ, skazaŭ, što pryjduć z vobšukam, kab ja praź ich pieradała rečy. Skazaŭ, miarkuje, što pa jaho pryjšli za kamientary.
Vobšuk adbyŭsia kala 11-j viečara. Tady pakazali paśviedčańni — sapraŭdy KDB. Vobšuk prajšoŭ cyvilizavana, ničoha nie zabrali, akramia telefona muža. Supracoŭniki KDB skazali, što zaviedzienyja dźvie spravy — adna pa artykule 369, abraza pradstaŭnika ŭłady, druhuju nie pamiataju. Ale, jak ja zrazumieła, spravy zaviali nie na Alaksieja, a ahułam.
Loša — aktyvist, lubić kamientary pisać. Ale ja bačyła, što jon pisaŭ u miascovaj supołcy — tam niama nijakich abraz.
Dzie jon siońnia, ja nie viedaju. Učora jon skazaŭ, što jaho paviazuć u Minsk. Ciapier ja zvaniu ŭ KDB — tam nie biaruć uvieś dzień».
***
Zatrymańni ludziej, jakija pakidali kamientary pra śmierć kdbšnika ad ruk Andreja Zielcera, prachodziać pa ŭsioj krainie.
Pa infarmacyi «Našaj Nivy», zahadčykam jurydyčnych kansultacyj siońnia pryjšoŭ zapyt z kalehii advakataŭ. Było skazana, što patrabujucca 30 advakataŭ, bo KDB zatrymaŭ 50 čałaviek pa 369 (Abraza pradstaŭnika ŭłady) i 130 (Raspalvańnie varožaści) Kryminalnaha kodeksa.
Raniej u dziaržaŭnych ŚMI i praŭładnych telehram-kanałach užo pahražali adkaznaściu ŭsim, chto pisaŭ kamientary pra zahinułaha siłavika. Mikałaj Karpiankoŭ, namieśnik kiraŭnika MUS, u efiry STB kazaŭ, što kamientatary, jakija hłumiacca, — heta «nieludzi», «mikroby», «vorahi, jakija zasłuhoŭvajuć fizičnaha źniščeńnia».