Kožny piaty minski čynoŭnik — cham i hrubijan
Amal kožny druhi prosta abyjakavy.
21.07.2009 / 11:49
Minskija čynoŭniki bolš schilnyja da farmalizmu i hrubasci, čym ich kalehi ŭ rehijonach.
Pra heta śviedčać vyniki čarhovaha etapu sacyjałahičnaha manitorynhu «Dumka nasielnictva Biełarusi ab stanie raboty pa debiurakratyzacyi dziaržaŭnaha aparatu», praviedzienaha infarmacyjna‑analityčnym centram pry Administracyi prezidenta Respubliki Biełaruś u krasaviku—mai 2009 hoda.
Vyniki apytańnia pakazali, što pry zvarocie ŭ dziaržaŭnyja ŭstanovy i inšyja arhanizacyi hramadzianie praktyčna ŭ dva razy čaściej sustrakajucca z prajaŭleńniem stanoŭčych jakaściaŭ rabotnikaŭ, čym admoŭnych. Adnak za apošni hod uzrasła dola adkazaŭ, u jakich adznačajucca vypadki prajaŭleńnia rabotnikami dziaržaŭnych arhanizacyj hrubasci, niepavahi, razdražnialnasci. Adpaviedna zniziłasia kolkaść tych, chto adznačyŭ stanoŭčyja jakasci rabotnikaŭ dziaržorhanaŭ, takija, jak taktoŭnaść, vietlivaść, umieńnie słuchać, dobrazyčlivaść, pavažlivaje staŭleńnie.
Na dumku apytanych hramadzian, dla supracoŭnikaŭ dziaržorhanaŭ Minska ŭ bolšaj stupieni, čym dla rabotnikaŭ dziaržustanoŭ inšych rehijonaŭ,
charakternaje prajaŭleńnie ŭ dačynienni da naviedvalnikaŭ takich admoŭnych jakaściaŭ, jak farmalizm, abyjakavaść (41,1%), razdražnialnaść (29,5%), hrubaść i chamstva (18,4%).
Čaściej za ŭsio sutykajucca sa stanoŭčymi jakaściami z boku rabotnikaŭ dziaržorhanaŭ pry zvarocie da ich žychary Viciebskaj vobłasci: uvažlivaściu i adkaznaściu (65,2%), taktoŭnaściu i vietlivaściu (37,1%), umieńniem słuchać i dobrazyčlivaściu (32,6 %), pavažlivym staŭleńniem (37,9%).
Usiaho było apytana 1 tys. 89 respandentaŭ va ŭzroście ad 18 hadoŭ i starej va ŭsich abłasnych centrach krainy i Minsku, rajonnych haradach i sielskich nasielenych punktach. Statystyčnaja chibnaść nie pieravyšaje 3 %. Heta dazvalaje śćviardžać, što vyniki daśledavańnia adlustroŭvajuć dumku nasielnictva krainy ŭ cełym.