Budzie vielmi cikava? U ruki ZŠA papaŭ šery kardynał Madura, jaki arhanizoŭvaŭ abychod sankcyj
17.10.2021 / 13:50
Ułady Kaba-Vierde ekstradziravali vieniesuelskaha śpiecpasłańnika Aleksa Saaba, zatrymanaha na zapyt ZŠA.
Zachodnieafrykanskaja dziaržava vydała ZŠA biznesoŭca i śpiecpasłańnika Vieniesueły ŭ Afrykanskim sajuzie Aleksa Saaba, paviedamiŭ Reuters sa spasyłkaj na nacyjanalnaje radyjo krainy, viadomaj taksama pad nazvaj Astravy Zialonaha Mysa.
U ZŠA Saaba abvinavačvajuć u stvareńni mižnarodnaj sietki kampanij dla abychodu nakładzienych na režym Madura ekanamičnych sankcyj. Amierykanskija prakurory vystavili jamu abvinavačvańnie ŭ admyvańni $350 młn praz amierykanskuju finansavuju sistemu na karyść vieniesuelskaha ŭrada.
Biznesoŭca zatrymali ŭ červieni 2020 hoda ŭ aeraporcie na vostravie Sał pry sumiesnaj apieracyi Kaba-Verde i Interpała. Saab nakiroŭvaŭsia ź Vieniesueły ŭ Iran na pryvatnym samalocie, jaki sieŭ u Kaba-Verde dla dazapraŭki.
Saab pa naradžeńni — hramadzianin Kałumbii livanskaha pachodžańnia, ale za svaje zasłuhi pierad Karakasam atrymaŭ hramadzianstva Vieniesueły.
Uviesnu 2021 hoda Viarchoŭny sud Kaba-Vierde zadavoliŭ zapyt ZŠA, adnak rašeńnie zastavałasia za ŭradam dziaržavy.
Urad Vieniesueły patrabavaŭ vyzvalić Saaba i zajaŭlaŭ pra jahonuju dypłamatyčnuju niedatykalnaść. Karakas śćviardžaŭ, što Saab byŭ vieniesuelskim dypłamatam, jaki znachodziŭsia z «humanitarnaj misijaj» u Iranie.
Značeńnie vydačy Saaba amierykanskamu pravasudździu možna acanić pa tym, što ŭ adkaz na heta Karakas abviaściŭ ab prypynieńni pieramoŭ z apazicyjaj, jakija raspačalisia ŭ siaredzinie žniŭnia ŭ Mieksicy pry pasiarednictvie narviežcaŭ.
U toj ža čas prezident susiedniaj ź Vieniesuełaj Kałumbii Ivan Dukie napisaŭ u svaim tvitary, što vydača Saaba — heta «tryumf u baraćbie z narkatrafikam, admyvańniem hrošaj i karupcyjaj» urada Madura.
Miarkujecca, što Saab viedaje šmat sakretaŭ pra apieracyi kiraŭnictva Vieniesueły.
Vieniesueła — heta 28-miljonnaja kraina ŭ Łacinskaj Amierycy, hałoŭnaje bahaćcie jakoj składaje nafta. Raniej jana ŭvachodziła ŭ lik samych raźvitych na kantyniencie. Pry kancy 1990-ch da ŭłady tam pryjšoŭ papulist Uha Čavies. Paśla jaho śmierci pierajemnik Nikałas Madura pieratvaryŭ dziaržavu ŭ aŭtarytarny režym, u jakim dziaržaŭnyja instytuty ŭzurpiravanyja kiraŭničaj hrupoŭkaj. I Čavies, i Madura ŭvieś čas kanfliktavali z susiedniaj Kałumbijaj i ZŠA.
Ministerstva zamiežnych spraŭ Rasii nazvała situacyju sa śpiecpasłańnikam Vieniesueły aburalnaj. «U Vašynhtonie, miarkujučy pa ŭsim, vyrašyli vyjści na novy ŭzrovień, stvaryŭšy zhubny precedent ekstradycyi ŭpaŭnavažanaj asoby, jakaja vałodaje dypłamatyčnym statusam. Rašuča asudžajem nazvanyja dziejańni, palityzavanaja padaploka jakich nie vyklikaje nijakich sumnievaŭ», — zajaviŭ namieśnik dyrektara Departamienta infarmacyi i druku viedamstva Mikałaj Łachonin.
Dalikatnaść situacyi jašče i ŭ tym, što na hetym tydni Ukraina zapatrabavała ad Kaba-Vierde vydać Natallu Pakłonskuju, pryznačanuju pasłom Rasii ŭ astraŭnoj respublicy.