Žurnalistcy Irynie Słaŭnikavaj i jaje mužu Alaksandru Łojku dali pa 15 sutak
Ich sudzili za «raspaŭsiud ekstremisckich materyjałaŭ».
01.11.2021 / 15:45
Administracyjnuju spravu suprać Słaŭnikavaj i Łojki pavodle art. 19.11 KaAP («Raspaŭsiudžvańnie, vyrab, zachoŭvańnie, pieravozka infarmacyjnaj pradukcyi, jakaja źmiaščaje zakliki da ekstremisckaj dziejnaści abo jakaja prapahanduje takuju dziejnaść») razhladaŭ sud Pieršamajskaha rajona Minska.
Irynu Słaŭnikavu i jaje muža Alaksandra Łojku zatrymali 30 kastryčnika pa viartańni z adpačynku ź Jehipta.
Alaksandr Łojka raspavioŭ padčas suda, što ich z žonkaj zatrymali na pašpartnym kantroli, zakavali ŭ kajdanki i navat nie dali zabrać bahaž. Da suda jon byŭ na Akreścina ŭ dvuchmiesnaj kamiery, dzie ahułam znachodziłasia 10 čałaviek. Tamu jamu davodziłasia spać na padłozie. Alaksandru prapanoŭvali zapisać «pakajalnaje videa».
Mužčynu abvinavacili ŭ repostach (zachoŭvańni) na staronkach u Facebook troch artykułaŭ za 2017, 2018, 2019 hady z sajta, jaki byŭ pryznany ŭładami «ekstremisckim» u lipieni 2021 hoda.
Da Iryny Słaŭnikavaj byli padobnyja pretenzii.
Iryna Słaŭnikava źjaŭlajecca pradstaŭnicaj u Biełarusi polskaha telekanała, pryznanaha biełaruskimi ŭładami ekstremisckim.