З філармоніі пасля прэм'еры звольнілі кампазітарку Ларысу Сімаковіч

31 кастрычніка ў Ларысы Сімаковіч быў апошні працоўны дзень у Беларускай дзяржаўнай філармоніі. Яна выйшла на сцэну, дзе гучаў яе новы твор — космамістэрыя «Край».

05.11.2021 / 16:31

У пятніцу 29 кастрычніка Ларысе Сімаковіч аддалі працоўную кніжку, піша «Радыё Свабода».

Па словах кампазітаркі, намеснік гендырэктара Андрэй Лапцёнак паведаміў, што з ёй не працягваюць кантракт «па ўзросце».

«У мяне скончыўся кантракт, які раней працягвалі некалькі гадоў без праблем. І раптам нечакана, хоць я магу здагадвацца пра нейкія рэальныя прычыны, намеснік гендырэктара сказаў, што «па прычыне ўзросту». Калі я запыталася, ці ёсць да мяне прафесійныя пытанні, намеснік адказаў упэўненым «не!», — расказала Сімаковіч «Свабодзе».

Ларыса Сімаковіч за 13 гадоў працы ў філармоніі паставіла 11 спектакляў, адкрыла новыя жанры для беларускага харавога мастацтва. Яна з 1992 года — сябра беларускага Саюза кампазітараў.

Апроч дзейнасці ў якасці прафесійнага кампазітара, Ларыса Сімаковіч працавала на палову стаўкі вядучым рэдактарам у медыйных структурах філармоніі. Яна складала анонсы і музычныя праграмкі для гледачоў. Паводле Ларысы, за амаль 13 гадоў працы ў філармоніі яна ніводнага прадукту не выдала на рускай мове, а толькі на беларускай.

«Хоць у філармоніі пераважае руская мова. На сёння там не засталося ніводнага чалавека, які б валодаў у той меры беларускай мовай, як валодаю я. І калі я спыталася адносна таго, што ніводнага беларускамоўнага ў філармоніі не застаецца, той жа намеснік дырэктара адказаў: «Ну как-то!» Для мяне стала ясна, што беларуская мова для гэтага чыноўніка не ёсць духоўнай каштоўнасцю, — кажа Ларыса Сімаковіч. — Я думаю, што гэта адна з першых прычын, бо беларуская мова сёння маркер, абазначэнне пазіцыі чалавека. Гэта было пры камунізме і пазней».

Ларыса Сімаковіч сказала, што цяпер шукае працу, «каб не думаць пра грошы, а пра творчасць».

Ларыса Сімаковіч вядомая як кампазітарка, балетмайстар, мастацкая кіраўніца фальклорнага тэатра «Госціца» і рэжысэр-пастаноўшчык, а да таго ж танцорка і спявачка.