Da 5,5 hoda turmy. U Breście ahučyli vyraki jašče 19 fihurantam spravy ab «masavych biesparadkach»

8 listapada ŭ Leninskim rajonnym sudzie Bresta ahučyli prysudy piataj hrupie abvinavačanych u spravie ab «masavych biesparadkach» paśla vybaraŭ 2020 hoda (č. 2 art. 293 KK), piša Radyjo Svaboda.

08.11.2021 / 15:14

DWA

Sud nad fihurantami prachodziŭ z 9 žniŭnia 2021 hoda.

Sudźzia Alaksandr Siemiančuk pakaraŭ:

• Jakava Šafarenku — 5 hadami 6 miesiacami ŭ kałonii ŭzmocnienaha režymu, a taksama štrafam 100 bazavych (šlacham składańnia pakarańniaŭ pa č. 2 art. 293 i č. 3 art. 205);
• Stanisłava Filimonava — 5 hadami kałonii ŭzmocnienaha režymu, a taksama štrafam 100 bazavych (šlacham składańnia pakarańniaŭ pa č. 2 art. 293 i č. 3 art. 205).

Usich astatnich asudzili pavodle č. 2 art. 293 KK Respubliki Biełaruś. Pakarali:

• Jaŭhiena Piekača — 4 hadami 11 miesiacami kałonii ŭzmocnienaha režymu (šlacham składańnia ź nieadbytaj «chimijaj» u 1,5 hoda);
• Alaksandra Cielešmana — 4 hadami 6 miesiacami kałonii ahulnaha režymu;
• Marka Antonava, Illu Vieramiejeva, Rusłana Vołkava, Ihara Harčaniuka, Pilipa Kanceviča, Ivana Soŭpiela, Siarhieja Traciuka — pa 4 hady ŭ kałonii ŭzmocnienaha režymu;
• Arcioma Klimčuka, Viktara Kazłoŭskaha, Hleba Ramanava, Ramana Sidziuka, Lva Cialipku, Alaksandra Cimafiejeva, Daniiła Chabaŭca — 3 hadami 6 miesiacami kałonii ŭzmocnienaha režymu;
• Paŭła Maźko — 3 hadami 6 miesiacami ahulnaha režymu.

U čym abvinavacili padsudnych?

Abvinavačańnie śćviardžaje, što padsudnyja 10 žniŭnia 2020 hoda padčas masavaha mierapryjemstva ŭ centry Bresta — na vulicach Savieckaj i Naftavaj, bulvarach Šaŭčenki i Kasmanaŭtaŭ, praśpiekcie Mašerava — nibyta «hruba parušyli hramadski paradak», «rabili pahromy» i «čynili hvałt z supracoŭnikaŭ pravaachoŭnych orhanaŭ», «naŭmysna paškodzili transpartnyja srodki dy inšuju majomaść».

U vyniku, pavodle viersii śledstva, paciarpieli bolš za 20 siłavikoŭ. Ahulnuju sumu naniesienaj škody dziaržaŭnyja orhany acanili ŭ 24 tysiačy rubloŭ (paškodžana 13 aŭtamabilaŭ milicyi, adzin aŭtobus, ščyty, šlemy, broniekamizelki, asfalt, tratuarnaja plitka, łaŭki, śmietnicy, drevy).

Akramia taho, Filimonavu i Šafarenku taksama stavili ŭ vinu kradziež 6 ton trubaŭ da śniežnia 2020 hoda. Na sudzie mužčyny tłumačyli, što truby lažali ŭžo iržavyja i zarosłyja pobač ź niedabudavanym budynkam, dzie ŭžo niekalki hadoŭ ničoha nie adbyvałasia i kudy možna bieśpieraškodna trapić. Tamu truby paličyli mietałałomam i pačali zdavać u adpaviedny punkt pryjomu.

Na adnym z pracesaŭ abvinavačany Siarhiej Traciuk zajaviŭ, što 10 žniŭnia jaho paranili. Jon lažaŭ u balnicy, dzie jamu pierasadžvali skuru. A sudziać jaho za toje, što jon kinuŭ płastykavuju butelku nibyta ŭ bok supracoŭnikaŭ i padniaŭ kavałak asfaltu. Pravaabaroncy adznačajuć, što z materyjałami spravy Siarhiej zmoh aznajomicca tolki na sudzie — u SIZA nie dali.

Kaho ŭžo pakarali

10 sakavika sudździa Viera Fiłonik asudziła dzieviać čałaviek na terminy ad 3 da 4,5 hoda kałonii. Niepaŭnaletnija Siarhiej Hackievič i Dzianis Chaziej atrymali pa 3 hady vychavaŭčaj kałonii.

21 maja sudździa Andrej Hruško prysudziŭ jašče 13 fihurantam ad 3 hadoŭ vychavaŭčaj kałonii da 5 hadoŭ turmy. Siarod abvinavačanych była i dziaŭčyna asudžanaha Dzianisa Chazieja 18-hadovaja Vitalija Bandarenka. Jaje pakarali 4 hadami kałonii ahulnaha režymu.

28 maja pačaŭsia sud nad treciaj hrupaj abvinavačanych. 12 žniŭnia sudździa Śviatasłaŭ Kalina prysudziŭ 10 fihurantam spravy, siarod jakich byŭ niepaŭnaletni Maksim Šatochin, ad 3 da 4,5 hoda pazbaŭleńnia voli.

Čaćviortuju hrupu pakarali 12 lipienia. Sudździa Leninskaha rajona Dźmitryj Šuryn prysudziŭ 8 abvinavačanym da 4,5 hoda kałonii ŭzmocnienaha režymu.

20 žniŭnia ŭ Maskoŭskim sudzie sudździa Ina Kłyšpač ahučyła prysud šostaj hrupie abvinavačanych, prysudziŭšy im ad 3 da 4 hadoŭ kałonii.

Ahułam u miežach spravy «ab masavych biesparadkach» na hety momant asudzili ŭžo 65 asobaŭ.