У Віцебску ад каранавіруса памерла 38-гадовая актывістка Юлія Барсукова
У жанчыны засталіся муж і двое сыноў.
09.11.2021 / 14:35
Народныя навіны Віцебска
Юлія Барсукова захварэла ў канцы кастрычніка. «Смаку няма, паху няма, тэмпература збіваецца толькі да 38,6. Што далей — мяшок?» — пісала яна на сваёй старонцы ў фэйсбуку 22 кастрычніка, піша «Радыё Свабода».
«Мы з ёй актыўна перапісваліся апошнім часам. Яна мне дасылала паведамленні, што ёй вельмі блага, што яна ўся гарыць, што тэмпература скача да 40 градусаў. Наколькі я ведаю, яна выклікала «хуткую», але тая ехала вельмі доўга, 8 гадзін», — патлумачыў блогер-фермер з Гомельскага раёна Юрый Ганцэвіч.
У каментарах да свайго допісу Юлія скардзілася, што не едзе «хуткая»: «Я зразумела, яны хочуць мяне забіць».
Юлія Барсукова атрымала вядомасць ад пачатку пратэстаў, з вясны 2020 года. Яна была актывісткай і адміністратаркай розных груп. Яе затрымлівала міліцыя, у кватэры адбываліся ператрусы, а суды давалі штрафы.