ГУБАЗіК прапануе пазбаўляць грамадзянства за злачынствы экстрэмісцкага характару, а таксама канфіскоўваць маёмасць
Галоўнае ўпраўленне па барацьбе з арганізаванай злачыннасцю і карупцыяй (ГУБАЗіК) прапануе пазбаўляць грамадзянства тых, хто быў прызнаны вінаватым у здзяйсненні некаторых катэгорый злачынстваў экстрэмісцкага характару.
24.11.2021 / 09:10
mlyn.by
Пра гэта mlyn.by паведаміў начальнік упраўлення Андрэй Паршын.
«Цяпер намі сумесна з зацікаўленымі дзяржаўнымі органамі прапрацоўваюцца заканадаўчыя ініцыятывы, накіраваныя на гарантаванне нацыянальнай бяспекі дзяржавы. У прыватнасці, мяркуем, што грамадзянства Рэспублікі Беларусь можа быць страчанае асобамі, прызнанымі вінаватымі ў здзяйсненні асобных катэгорый злачынстваў экстрэмісцкай скіраванасці або прычыненні цяжкай шкоды інтарэсам Рэспублікі Беларусь, незалежна ад спосабу набыцця грамадзянства», — сказаў ён.
Па яго словах, Упраўленне таксама прапануе прымяняць да асоб, якія здзейснілі злачынствы экстрэмісцкай скіраванасці, у якасці дадатковага пакарання агульную канфіскацыю маёмасці.
Таксама ва ўпраўленні выступаюць з ініцыятывай усталяваць безумоўную адміністрацыйную адказнасць за падпіску на інтэрнэт-рэсурсы, матэрыялы якіх былі прызнаныя экстрэмісцкімі.