Brytanski słoŭnik Collins nazvaŭ słova 2021 hoda. I jano nie źviazanaje z kavidam
Da 2021 hoda hetaje słova mała chto viedaŭ. A sioleta častata jaho vykarystańnia vyrasła na 11000%. Čamu ludzi tak šmat pačali jaho ŭžyvać i pry čym tut mahčymaść zarabić vialikija hrošy, nie ŭstajučy z-za kampjutara, tłumačyć BBC.
26.11.2021 / 11:39
Karcinu Benksi spalvajuć publična, kab utvaryć NFT. Skryn videa Burnt Finance
NFT (non-fungible token) — «nieŭzajemazamianialny tokien» — heta takija siertyfikaty, u jakich havorycca, što vy vałodajecie aryhinałam virusnaha videa, ci miema, ci papularnaha tvita. Ich kopii možna pradavać jak tvory mastactva, ale aryhinał tvora pry hetym abaviazkova źniščajecca — kab stvaryć ličbavy aktyŭ.
Niekatoryja sioleta surjozna razbahacieli na svaich NFT.
Dastatkova zhadać, jak viasnoj vuličny mastak Benksi pradaŭ svaju karcinu za 95 tysiač dalaraŭ błakčejn-kampanii, a paśla abličboŭki aryhinała karciny kampanija spaliła jaje ŭ žyvym efiry, kab stvaryć virtualny aktyŭ. Atrymany takim čynam NFT-tokien byŭ pradadzieny na aŭkcyjonie značna daražej za aryhinał karciny.
Razam z NFT u šort-list uvajšli dva inšyja słovy, źviazanyja z tendencyjaj abličboŭvać rečaisnaść — crypto (skarot ad kryptavaluty) i metaverse (trochvymierny virtualny suśviet).
Redaktary słoŭnika taksama adznačyli try vyrazy, źviazanyja z pandemijaj: double-vaxxed (toj, chto atrymaŭ dźvie dozy vakcyny), pingdemic (masavaja niemahčymaść chadzić na pracu, pakolki ŭsie supracoŭniki vymušanyja vychodzić na samaizalacyju paśla kantaktu z tymi, u kaho paźniej vyjavili karonavirus — takuju infarmacyju ludzi atrymlivali praź śpiecyjalnyja paviedamleńni na telefon — pinhi), hybrid working (režym, kali supracoŭniki pravodziać u ofisie tolki častku pracoŭnaha času).
U 2020 hodzie układalniki Collins English Dictionary słovam hoda nazvali lockdown (łakdaŭn).