Za hod cana kapusty vyrasła na 120%. Čamu ŭ Biełarusi tak mocna padaražeła harodnina
Ceny na tradycyjnyja dla biełaruskaha stała morkvu, bulbu dy kapustu sioleta ździvili šmat kaho. Pry tym vysokija ceny trymajucca ŭ samy siezon, jakraz paśla ŭborki ŭradžaju, kali harodnina samaja tannaja. U čym pryčyna? Jak vyśvietliła «Naša Niva», na košt paŭpłyvali adrazu niekalki faktaraŭ.
28.11.2021 / 08:42
Stolki pieršaja kapusta kaštavała na Kamaroŭcy naprykancy žniŭnia. Fota: city-dog.by.
Što adbyłosia z cenami?
Kožny miesiac Biełstat publikuje infarmacyju pa siarednich cenach na spažyvieckija tavary i pasłuhi. My pahladzieli, jak jany mianialisia pa piaci vidach harodniny: uziali bulbu, morkvu, buraki, cybulu dy kapustu. Paraŭnoŭvali košty za kastryčnik 2020 hoda z kastryčnikam 2021.
Akazałasia, što bolš za ŭsio padaražeła kapusta: až na 120%, z 59 kapiejek za kiłahram da 1,3 rubla. Potym idzie bulba i morkva (na 77%), zatym burak (na 70%). I zamykaje śpis cybula, cana jakoj nabrała 59%.
| Harodnina | Cana (rubli) | Rost (pracenty) | |
| 2020 | 2021 | ||
| Kapusta | 0,59 | 1,3 | 120% |
| Bulba | 0,74 | 1,31 | 77% |
| Morkva | 0,73 | 1,29 | 77% |
| Buraki | 0,67 | 1,14 | 70% |
| Cybula | 0,89 | 1,32 | 59% |
Miž tym, servis infoprice.by pakazvaje, što ciapier cana na bulbu ŭ hipiermarkietach vahajecca ad 1,27 da 1,85 rubla za kiłahram. Kapustu pradajuć pa canie ad 1,2 da 1,7 rubla za kiło, burak — ad 1,12 da 1,5 rubla, cybulu — ad 0,99 da 1,54 rubla, morkvu — ad 1,15 da 1,39.
Jak my vyhladajem na fonie susiedziaŭ?
My paraŭnali ceny na harodninu ŭ papularnych anłajn-kramach Biełarusi i susiedziaŭ. Nie pretendujem na daśledavańnie, ale peŭnyja vysnovy zrabić možna.
Tak, samaja tannaja kapusta ŭ Litvie, a samaja darahaja — u Biełarusi, u 2,2 razy daražejšaja, čym u Litvie. Biełaruskaja bulba bolš čym udvaja daražejšaja za ŭkrainskuju, i pa košcie jaje abhaniaje tolki rasijskaja.
Našu morkvu pa košcie pieraplunuła tolki polskaja i rasijskaja, a buraki — polskija i litoŭskija. Nu i cybula daražejšaja iznoŭ tolki ŭ Polščy i Łatvii.
| Pradukt | Ceny (biełaruskija rubli) | |||||
| Litva (Barbora) | Polšča (Aushan) | Łatvija (Rimi) | Ukraina (Aushan) | Rasija (Pieriekriestok) | Biełaruś (Je-dastaŭka) | |
| Kapusta | 0,83 | 1,59 | 1,4 | 0,87 | 1,7 | 1,89 |
| Bulba | 1,12 | 0,98 | 1,61 | 0,67 | 1,62 | 1,49 |
| Morkva | 1,4 | 1,63 | 1,12 | 0,71 | 1,36 | 1,15 |
| Buraki | 1,29 | 1,59 | 1,12 | 1,11 | 1,15 | 1,19 |
| Cybula | 1,4 | 1,23 | 1,29 | 1,01 | 1,05 | 1,19 |
Čamu ŭsio tak padrasło?
Jak raskazaŭ «Našaj Nivie» adzin z supracoŭnikaŭ adździeła zakupki bujnoj handlovaj sietki, košty na harodninu vyraśli praź niekalki faktaraŭ.
«Pa-pieršaje, heta drennyja ŭmovy nadvorja, što byli letam, — kaža jon. — Pa-druhoje, z-za nizkich koštaŭ u minułym hodzie fiermiery pasadzili značna mienš harodniny.
Taja ž kapusta minułaj vosieńniu ŭ aptovaj zakupcy kaštavała 20 kapiejek za kiłahram. I heta z dastaŭkaj. Pa takich cenach jaje vyroščvać niavyhadna. Niekatoryja jaje prosta pieraarali, bo košt uborki, padrychtoŭki i dastaŭki daražejšy, čym 20 kapiejek za kiłahram.
Pa-treciaje, u Rasii sioleta ŭradžaj mienšy i tamu harodnina (bulba i kapusta) jeduć tudy. Nu i pa-čaćviortaje, rost koštaŭ na charčovyja tavary — heta ahulnasuśvietny trend».
Surazmoŭca «NN» kaža, što ŭ kastryčniku byŭ ažyjataž na bulbu. Pryčyna — nizki ŭradžaj u Rasii z-za praciahłych daždžoŭ. Tamu ceny raśli, ale ŭžo na pačatku listapada adkacilisia ŭniz i stabilizavalisia, bo ŭborka skončyłasia.
«Jak vykručvalisia? Rasija zabirała biełaruskuju bulbu, a my kuplali ukrainskuju, bo jana tańniejšaja, — adznačaje ekśpiert. — Zaraz hałoŭnaje pytańnie ź biełakačannaj kapustaj.
Na hetym tydni biełarusy padniali zakupačnyja ceny na ŭzrovień da 1,5 rubla za kiłahram. Ciapier tańniej vychodzić polskaja kapusta.
Mahčyma, u palakaŭ bolšyja rynki zbytu i cana bolš pradkazalnaja.
Što tyčycca morkvy, to jaje šmat i ŭ nas, i ŭ Rasii. A voś cybuli ajčynnaj nie tak i šmat, ale ŭ Rasii ź liškam, tamu situacyja z koštami bolš-mienš stabilnaja».
Jašče adzin surazmoŭca «Našaj Nivy» adznačyŭ, što košt biełaruskaj bulby pryviazany da ekspartnaj cany.
«Sioleta startavaja cana na bulbu była praktyčna identyčnaja canie minułaha hoda, ź jakoj finišavała ŭborka da momantu zakładki ŭ schoviščy, — kaža surazmoŭca. — Siezon u biahučym hodzie pačaŭsia ź vielmi vysokaha ŭzroŭniu. Cana pačała raści da taho momantu, pakul asnoŭny rynak (rasijski) nie skazaŭ: «Chopić, rabiaty, naša cana na rasijskuju bulbu nižejšaja za vašu, biełaruskuju».
Jašče niejki čas pa iniercyi niekatoryja eksparciory adpraŭlali pradukcyju ŭ Rasiju. Ale ŭ adzin cudoŭny momant pajšła zvarotnaja tendencyja: paśla taho jak abjomy ekspartnych adhruzak skaracilisia, cana na ŭnutranym rynku pačała źnižacca.
Ciapier aptovy košt viarnuŭsia da koštaŭ pačatku ŭborki. Cana na ajčynnuju bulbu amal roŭnaja canie ŭkrainskaj z ulikam dastaŭki ŭ Biełaruś — 65-70 kapiejek biez PDV».
Naš surazmoŭca adznačaje, što niemałavažnym faktaram źjaŭlajucca i košty Tałočynskaha kansiervavaha zavoda. Heta adzin z bujniejšych vytvorcaŭ bulby ŭ Biełarusi. U peŭny momant zavod pačaŭ padymać ceny, i za im staŭ raści «opt».
«Situacyja z rostam cany na bulbu ŭ Biełarusi była nastolki surjoznaja, što Ministerstva sielskaj haspadarki i charčavańnia razhladała prapanovu ŭvieści zabaronu na ekspart bulby. Rašeńnie było amal pryniataje, ale ŭ apošni momant dakumient nie padpisali», — kaža naša krynica.