«U miesiac na pradukty sychodzić kala 1000 rubloŭ». Paraŭnoŭvajem biełaruskija ceny z cenami ŭ susiednich krainach

Časam padajecca, što biełaruskija pradukty daražejuć na vačach. «Naša Niva» pisała, što harodnina padrasła ŭ canie na 70-120%. Ale jak my vyhladajem na fonie našych susiedziaŭ? U rubrycy «Dzie tańniej» paraŭnoŭvajem ceny ŭ supiermarkietach Biełarusi, Rasii, Ukrainy, Polščy, Litvy i Łatvii (paraŭnalnaja tablica ŭ kancy tekstu). A biełarusy, jakija žyvuć u stalicach hetych krain, raskazvajuć, kolki traciać na pradukty.

09.12.2021 / 09:16

Minsk. «Biareš jakija-niebudź 50 rubloŭ, a na ich užo stolki nie kupiš, jak raniej»

Alenie 42 hady, žančyna žyvie ŭ Minsku i pracuje łahistam. U Aleny jość siamja — muž i dačka, tamu ŭ kramie žančyna zakupajecca pa vychadnych, kab ježy było dastatkova na praciahu tydnia.

«Na miesiac nam treba kala 800 rubloŭ na siamju. U praduktach my siabie nie abmiažoŭvajem. My jadzim usio: miasa, harodninu, sadavinu, mučnoje, — raskazvaje jana. — Jość u Minsku darahija kramy, dzie ceny adroźnivajucca ad inšych. Naprykład, «Hipa» i «Hryn». Z tannych — «Jeŭraopt», «Santa». Ja chadžu bolš ŭ «Jeŭraopt». Tam možna kupić miasa tańniejšaje.

Ale niejkich inšych praduktaŭ, jakija jość u inšych kramach, tam, naprykład, niama. Darečy, mnohija pradukty stali daražejšyja. Naprykład, małočnyja tavary, kuryca, pamidory, jajki ŭžo dva z pałovaj rubla, banany pad try rubli. Jašče dzieści źnikli cełyja kuraniaty. Kurania pradajecca ŭ častkach», — kaža jana.

Pa słovach Aleny, jana karystajecca źnižkami, ale śpiecyjalna pa ich u kramu nie chodzić.

«Zrazumieła, što jość źnižki, ale ci sapraŭdnyja jany? Nie viedaju. Kali jość niešta na źnižcy, što mnie treba, biaru. Niama na źnižcy, ale treba — taksama biaru, — kaža jana. — Ale toje, što košty vyraśli, heta dakładna. Biareš jakija-niebudź 50 rubloŭ, a na ich užo stolki nie kupiš, jak raniej kuplaŭ. Na pradukty vydatkoŭvaju bolš za pałovu zarpłaty. Kolki heta dakładna ŭ pracentach, nie viedaju. Ale idzie šmat hrošaj».

Siaredni zarobak u Biełarusi za kastryčnik skłaŭ 1479 rubloŭ «brudnymi». Miž tym, pavodle źviestak Biełstata, vydatki na pradukty charčavańnia biełarusaŭ składajuć u siarednim 39% ad dachodaŭ.

Maskva. «Kuplaju pradukty ŭ roznych miescach, kab sekanomić i nie pierapłačvać»

Alonie 33 hady, jana biełaruska i voś užo dzieviać hadoŭ žyvie ŭ Maskvie i pracuje na radyjo. Jany žyvuć razam z mužam. I, jak praviła, u miesiac na ježu traciać kala 20-30 tysiač rasijskich rubloŭ, to-bok prykładna 690-1035 rubloŭ.

«U nas davoli typovy praduktovy košyk, jak va ŭsich: kuryca, harodnina, sadavina, mučnoje i hetak dalej. Praŭda, my nie kuplajem čyrvonaje miasa. — kaža Alona. — Čyrvonuju ikru, viadoma, my nie jadzim łyžkami, ale ŭ praduktach siabie nie abmiažoŭvajem. Ja lublu jakasnuju harodninu, tamu kuplaju na rynku. Jana tańniejšaja tam i smačniejšaja».

Zvyčajna Alona chodzić pa roznyja pradukty ŭ roznyja kramy, kab nie pierapłačvać. Kaža, nie moža sabie dazvolić zakuplacca tolki ŭ adnym miescy.

«Ja ŭ kramu chadžu kožny dzień, ale pytańnie ŭ maštabach zakupak. Mužu časta hatuju ježu z saboj na pracu. Tamu niejkija drobnyja tavary dakuplaju», — havoryć jana.

Pa słovach Alony, navat niahledziačy na źnižki, košty na pradukty ŭ Maskvie apošnim časam adčuvalna vyraśli.

«Nie dumaju, što ŭ źnižkach jość vialiki sens. Samaja ŭ nas drennaja krama ŭ Maskvie — «Dyksi». Šmat praterminavanych i sumnieŭnych praduktaŭ. Darahaja krama — «Azbuka vkusa». Liču, što krama vielmi pieraacenienaja. Samyja chadavyja pradukty tam kaštujuć značna daražej. Nacenka za statusnaść. Mnie voś padabajecca chadzić u «Ašan». Ale jakasny syr u nas usiudy doraha kaštuje. Ryba biełaja i čyrvonaja taksama, dobry alej — heta ŭsio niatanna. Karysnyja pradukty ŭ pryncypie darahija».

Siaredniaja naličanaja zarpłata ŭ Rasii ŭ vieraśni składała 54 687 rasijskich rubloŭ, ci 1892 biełaruskija. Pa źviestkach vedomosti.ru, amal tracina vydatkaŭ rasijan — 29,7% — prypadaje na pradukty charčavańnia.

Kijeŭ. «Kali kožny dzień abiedać u stałovaj, to za miesiac atrymajecca kala 150 dalaraŭ»

Alaksandr žyvie ŭ Kijevie i pracuje dystancyjna ŭ mižnarodnaj IT-kampanii. Chłopiec niadaŭna skončyŭ VNU, zabraŭ dypłom i vyrašyŭ źjechać ź Biełarusi. U praduktovych kramach Alaksandr byvaje niekalki razoŭ na tydzień, čaściej zachodzić u kaviarni.

«U Kijevie šmat dzie možna pajeści, i heta tanna. Navat tańniej, čym kuplać pradukty ŭ kramie. Na sup treba miasa, bulba, morkva. A tut možna za 30 hryŭniaŭ (kala 2,8 biełaruskaha rubla, — zaŭv. «NN») kupić hatovy sup. I kožny dzień chadzić, i jon budzie rozny», — kaža małady čałaviek.

Kali ŭsio ž Alaksandr zachodzić u kramu, to nabyvaje samaje nieabchodnaje i paŭfabrykaty, kab pry patrebie chutka pajeści.

«Charčujusia hranołaj, małakom, kuplaju jajki, kašy, makarony, rys. Zapiakaju kurycu, usialakija sasiski, lublu rybu — usio heta niejak kambinujecca, — adznačaje jon. — Šmat čaho kuplaju hatovaha ŭ kramie.

Akcyi i karty jość, ale źnižkavyja, nazapašvalnyja karty zbolšaha elektronnyja. Kolki ja traču na pradukty ŭ miesiac, vielmi składana skazać, ale mnie majho zarobku chapaje, i navat jašče zastajecca. Kali kožny dzień abiedać u stałovaj, to za miesiac atrymajecca kala 150 dalaraŭ».

Va Ukrainie siaredni naličany zarobak za kastryčnik skłaŭ 14 045 hryŭniaŭ, ci 1313 rubloŭ. Zhodna ź infarmacyjaj economy.24tv.ua, vydatki na pradukty charčavańnia ŭkraincaŭ składajuć 39,5% ad dachodaŭ.

Varšava. «Ceny na adnym uzroŭni ź biełaruskimi, ale jość pradukty, jakija trochi tańniejšyja»

Illi 22 hady, jon pierajechaŭ u Varšavu letam 2021ha. Chłopiec skončyŭ u Minsku BDU i paśla hetaha vyrašyŭ iści ŭ mahistraturu, ale ŭžo nie ŭ Biełarusi.

Zvyčajna Illa charčujecca ŭsuchamiatku, jak i ŭsie studenty. Tamu ŭ supiermarkiet kala doma zachodzić dosyć časta. Chłopiec kaža, što zvyčajna karystajecca źnižkavymi kartami: maje karty ledź nie kožnaha supiermarkieta.

«U ich dobraja sistema nazapašvańnia. Potym hetymi bonusami možna raspłačvacca. Źnižki byvajuć dastatkova časta, ledź nie kožny tydzień, — raskazvaje małady čałaviek. — Raspaŭsiudžanaja akcyja «dva pa canie adnaho», tady źnižki vahajucca ŭ miežach ad 10% da 70%».

«Na pradukty ŭ mianie idzie u miesiac prykładna 250 dalaraŭ, ci 615 biełaruskich rubloŭ, — kaža Illa. — Heta z tym ulikam, što ja sabie naohuł ni ŭ čym nie admaŭlaju. Abiedać ja chadžu ŭ stałovyja, kaviarni. Zvyčajna traču 4 dalary, ci kala 10 biełaruskich rubloŭ. Całkam dastupny košt.

U kramie kuplaju miasa, makarony, kašy, małako. Siońnia ŭ mianie ŭ košyku cybula za 1,69 złotaha za kiłahram, cukar za 2,48 złotaha za kiłahram, hrečka za 4 złotyja za 400 hramaŭ, chleb za 3,5 złotaha za 500 hramaŭ».

U Polščy na kaniec druhoha kvartała siaredniaja zarpłata skłała 5505 złotych, abo 3633 biełaruskija rubli. Pa źviestkach anothercitizenship.com, na pakupku praduktaŭ u palaka sychodzić kala 30% ad zarobku.

Litva. «Za adzin pachod u kramu traču kala 10 jeŭra»

Hleb taksama student. Jon žyvie i vučycca ŭ Vilni, a ŭ Biełarusi vučyŭsia ŭ BDU. Kaža, što pakul viartacca nie źbirajecca.

Praduktovaja krama znachodzicca pobač z domam Hleba. Kali chłopiec tolki pryjechaŭ, pierš za ŭsio jon vyrašyŭ pajści ŭ supiermarkiet i pahladzieć na jeŭrapiejskija košty.

«Traču na pradukty prykładna 150 jeŭra ŭ miesiac, — raskazvaje jon. — Kuplaju harodninu, sadavinu, paŭfabrykaty, bliny, cepieliny. Na śniadanak u mianie zvyčajna miuśli ci kašy. Pa adčuvańniach, košty na ŭzroŭni biełaruskich. Voś, naprykład, 400-500 hramaŭ kurynaha file kaštuje 2,44 jeŭra. Heta 6,89 biełaruskaha rubla.

Za adzin pachod u kramu traču kala 10 jeŭra, chadžu niekalki razoŭ na tydzień. Na moj pohlad, niejkaj roźnicy, dzie kuplać ježu, niama. U niejkaj kramie moža być źnižka, a ŭ niejkaj nie, ale tut treba mieć čas, kab heta adsočvać», — kaža jon.

Siaredni zarobak ŭ Litvie ŭ druhim kvartale 2021 hoda byŭ 1566 jeŭra da vypłaty padatkaŭ, abo 4425 biełaruskich rubloŭ. Baltnews paviedamlaŭ, što litoŭcy traciać na pradukty charčavańnia kala 31,5% dachodaŭ.

Łatvija. «Možna kupić łasosia pa 4 jeŭra abo hranat za 19 centaŭ za kiło»

Ženi 33 hady. Jana žyvie ŭ Ryzie razam z mužam i sabakam. U Łatvii jana z krasavika hetaha hoda. Pa śpiecyjalnaści jany prahramisty.

Što tyčycca trat na pradukty, to dziaŭčyna adznačaje: amal adrazu zrazumieła, što ŭ Łatvii možna žyć vielmi ekanomna, kali chadzić u hipiermarkiety.

«U Ryzie jość niekalki tannych hipieraŭ, u jakich usie zakuplajucca. My žyviom u centry, tamu ŭ kramy kala doma nie chodzim — tam ceny ŭ razy vyšejšyja, čym u hipierach i na ŭskrainie, — havoryć dziaŭčyna. — Kali ja kažu ŭ razy, ja maju na ŭvazie ŭ razy: u siarednim u 2,5 raza. U hipierach tavary na źnižkach raźbirajuć za paŭdnia, tamu što tut jany sapraŭdnyja: 50-25%. Možna kupić łasosia pa 4 jeŭra za kiło abo hranat za 19 centaŭ za kiło. A praz tydzień łasoś budzie pa 10 jeŭra, a hranat — pa 2».

Taksama dziaŭčyna karystajecca i źnižkavymi kartami z prahramami nazapašvańnia bonusaŭ. Pa ich, kaža biełaruska, možna ekanomić kala 10%. Tak, na charčavańnie ŭ Ryzie siamja tracić kala 350 jeŭra za miesiac, ci 1010 rubloŭ.

«Pry hetym nie mahu skazać, što my ŭ čymści sabie admaŭlajem. Jadzim toje ž, što jeli ŭ Biełarusi, tracim na ježu prykładna stolki ž. Tolki na ceny hladzim, a ŭ Biełarusi amal nie hladzieli, — raskazvaje Ženia. — U astatnim niama roźnicy. My miasa nie jadzim, naš racyjon — ryba, harodnina, sadavina, małočka, makarony, kandytarskija vyraby. U Łatvii ŭ paraŭnańni ź Biełaruśsiu vielmi darahaja stamatałohija. Kamunałka i hramadski transpart. A pa ježy asablivaj roźnicy niama».

Siaredni zarobak u Łatvii na kaniec treciaha kvartała składaŭ 1143 jeŭra ŭ miesiac da vypłaty padatkaŭ, abo 3299 rubloŭ. Baltnews paviedamlaje: siaredniestatystyčny łatvijec z takim zarobkam tracić na pradukty 23,3% ad svajho dachodu.

Dzie tańniej? Paraŭnoŭvajem košty z kramaŭ, kudy chodziać našy hieroi

My paprasili hierojaŭ našaha materyjału pafatahrafavać ceny ŭ kramach, kudy jany zaŭždy zachodziać. Pieraviali ceny ŭ biełaruskija rubli pa aktualnym kursie i supastavili ŭ vialikaj tablicy.

Nashaniva.com