«Doktar skazaŭ, što ja naradziłasia ŭ kašuli». Biełaruska pieramahła ałkahalizm, rak i adkryła biznes u ZŠA
Kaciarynie 43 hady, pa adukacyi jana juryst. Žančyna naradziłasia i vyrasła ŭ Biełarusi, ale ŭ 36 hadoŭ jana źjechała ŭ Ńju-Jork, dzie pieramahła ałkaholnuju zaležnaść i rak, i zmahła naładzić svaju spravu. Žančyna raskazała «Našaj Nivie» pra vyprabavańni, jakija pierad joj staviła žyćcio, i pra toje, jak jana zmahałasia z najciažejšymi zachvorvańniami.
10.01.2022 / 07:58
Fota tut i dalej z ułasnaha archiva hieraini publikacyi
«Mnie treba było pačynać žyć znoŭ, kali ź mianie niby ździorli skuru».
«Ja vyjšła zamuž dastatkova rana — u 22 hady, — uspaminaje žančyna. — Sustrakacca, a potym i žyć razam, my z byłym mužam pačali, kali mnie było 17. My byli razam kala 12 hod, uličvajučy i pieryjad spatkańniaŭ. U 2001 hodzie u nas naradziłasia dačka. Ale tak skłałasia, što raźvialisia. Mnie na toj momant było amal 29, a dačce piać».
Kankretnyja pryčyny razvodu Kaciaryna nie nazyvaje, ale kaža, što ich było dastatkova i jany byli važkija. Adna ź ich — siamiejny hvałt.
«Ja doŭha nie chacieła razvodzicca z-za dziciaci. Jak i bolšaść žančyn, musić, na postsavieckaj prastory. Ciapier razumieju, što nielha ciarpieć dziela dziaciej. Heta dakładna. Žančyny, jakija padviarhajucca hvałtu, nie mohuć vychoŭvać psichałahična zdarovaje dzicia», — kaža jana.
Pa słovach Kaciaryny, razvod jana pieražyvała vielmi ciažka. Spatrebiłasia kala troch hadoŭ, kab krychu adaptavacca da inšaha žyćcia. Žančyna pačała vypivać.
«Situacyja z razvodam padkasiła i psichałahična złamała. Ja nie viedała, jak žyć, na mnie była adkaznaść za dzicia i mnie było strašna. Treba było pačynać žyć znoŭ, kali ź mianie sadrali skuru. Takija emocyi i pačućci ŭ mianie tady byli. Było vielmi strašna, ale mahu skazać, što razam ź im było pačućcio niejmaviernaj svabody», — kaža jana.
Inšaje žyćcio pačałosia z taho, što dačka Kaciaryny pajšła ŭ pieršy kłas, a sama žančyna vyrašyła syści ź jurysprudencyi. Pracu pa śpiecyjalnaści jana nie mahła znajści, tamu vyrašyła pajści na kursy pa manikiury.
«Ja chavała butelki ŭ šafach»
Razam z novym žyćciom u hety samy pieryjad u žančyny pačaŭ surjozna prahresavać ałkahalizm. Hetaje zachvorvańnie potym radykalna źmianiła žyćcio Kaciaryny.
«Ja naradziłasia ałkaholikam, — ličyć jana. — Heta było niepaźbiežna z-za hienietyčnaj schilnaści. Moj baćka pamior u 40 hod ad ałkaholu ŭ noč na Novy hod, moj dziadula taksama ałkaholik. I ja dumaju, što ŭ mianie była schilnaść. Dy i pieršuju svaju stopku ja vypiła ŭ 15 hod, kali dziadula hnaŭ samahonku. Tady pić było normaj.
Ałkahalizm — heta dušeŭnaja chvaroba, mientalnaja. Na žal, miedycyna tut biaśsilnaja. Ja ranimy i miakki čałaviek, jakomu na toj momant było ciažka spraŭlacca z tymi vyklikami, jakija mnie padavała žyćcio. Ałkahol dapamahaŭ zahłušyć i adyści ad prablem, jak zdavałasia mnie tady. Viadoma, prablemaŭ rabiłasia bolš i bolš.
Tady ja nie razumieła, što adbyvajecca. Nie pryznavała, što ja ałkaholik. Ja tolki pačynała kacicca ŭniz, možna skazać, što heta byŭ pačatak kanca. U niejki momant ja ŭžo nie mahła abychodzicca bieź śpirtnoha. Užyvała kožny dzień. Była fizičnaja ciaha.
Ja staranna sprabavała heta ŭsio chavać ad dziciaci. Chavała butelki ŭ adziežnych šafach. Padman, chłuśnia dla siabie samoj i navakolnych. Tak ja žyła vielmi doŭhi čas. Zarablać mnie stanaviłasia ŭsio składaniej i składaniej, dy i nie było žadańnia, było stałaje adčuvańnie biezvychodnaści. U takoj ahonii ja sprabavała žyć.
Časta vyklikała sabie na dom chutkuju dapamohu, jany mnie stavili kropielnicy i vyvodzili z zapojaŭ. Prachodziła paru dzion — i ŭsio znoŭ viartałasia. Heta było zamknionaje koła, ja nie mahła spynicca. Da narkołaha ja nie źviartałasia, bo byŭ mocny strach asudžeńnia. Na žal, u nas, savieckich ludziej, pačućcio soramu ŭvabranaje z małakom maci».
«Mnie patrebny byŭ pastajanny dopinh. Dajšło da taho, što ja stała pić na pracoŭnym miescy»
Praź siem hod pjanstva Kaciaryny jaje dačka nie vytrymała i pajšła žyć da baćki. Na toj momant dačce było 13. Žančyna nazyvaje toj dzień samym strašnym u žyćci: z hetaha momantu jana stała pić jašče macniej.
«Ja čakała, što vierniecca, ale jana nie viarnułasia, — raskazvaje Kaciaryna. — Praź niekalki miesiacaŭ ja stała dumać pra adjezd: maja maci žyła ŭ ZŠA ŭžo kala 25 hadoŭ. Adzinaje, što mianie trymała ŭ Biełarusi — maja dačka, ale ja adčuvała, što joj nie patrebnaja».
Tak pierad Kaladami 2014 hoda žančyna kupiła bilet na samalot i adpraviłasia ŭ ZŠA da svajoj maci. Spačatku dumałasia, što prosta adpačyć i ŭbačyć inšuju karcinku. Ale potym biełaruska zmahła lehalizavacca tam i znajšła pracu.
«Uładkavałasia mieniedžaram u padatkovy ofis. Spačatku zarablała 10 dalaraŭ za hadzinu, a potym mianie pavysilii, apłata vyrasła da 20 dalaraŭ, — raskazvaje žančyna. — Ja ŭciahnułasia, mnie spadabałasia zarablać. Ale ałkahol nikudy nie źnik. Mnie patrebny byŭ pastajanny dopinh. Dajšło da taho, što ja stała pić na pracoŭnym miescy».
Pierałomnym momantam dla Kaciaryny stali surjoznyja zapoi z «błekautami». Heta jaje mocna spałochała.
«Ja nie pamiatała, dzie ja była i što rabiła. U takim stanie možna było šmat čaho narabić, ale ŭ toj samy čas ja razumieła, što nie mahu biez ałkaholu, — uspaminaje žančyna. — Maja maci prapanavała mnie pajści ŭ adździaleńnie detaksikacyi. Paśla adzinaccaci dzion u hetym adździaleńni mianie adpravili ŭ reabilitacyjny centr, dzie akazvali dapamohu ałkaholikam i narkamanam. Ja tam była 28 dzion. Paśla mianie vypisali, i paśla hetaha ja stała naviedvać hrupy ananimnych ałkaholikaŭ».
Žančynie paraili kožny dzień chadzić na sustrečy ananimnych ałkaholikaŭ na praciahu 90 dzion. Praz try miesiacy ŭ jaje źnikła fizičnaja ciaha da ałkaholu i źjaviłasia nadzieja.
«Paśla hetaha stała chadzić try razy na tydzień. Mnie było soramna z maim mientalitetam, ale ja pajšła, bo sama nie mahła spravicca z hetym. Vynik ja adčuła adrazu. Kali pryjšła ŭ hrupu, adčuła, jakija tam dobryja ludzi», — kaža jana.
Ale na hetym vyprabavańni jaje nie skončylisia…
«Doktar skazaŭ, što ja pavinna była b pryjści da jaho praz hod z apošniaj stadyjaj»
Na pačatku studzienia 2017 hoda ŭ Kaciaryny znajšli rak małočnaj załozy. Adnojčy rankam jana jak zvyčajna źbirałasia na pracu i varyła sabie kavu. I tut adčuła bol źleva kala hrudziej
«Pakłała na hetaje miesca pravuju ruku, a pad rukoj stała niešta nadzimacca — heta i była puchlina, — raskazvaje žančyna. — Jana była z kurynaje jajka. Ja spužałasia i paimčałasia da doktara. Doktar patłumačyŭ, što puchlina rasła chutka i nacisnuła na sasud, jon razarvaŭsia i tamu było baluča. A naohuł rak nie balić.
Dla mianie heta byŭ prysud. Stała strašna, i ja sarvałasia. Heta byŭ moj apošni mocny zapoj, z taho momantu voś užo piać hod ja ćviarozaja».
Vyśvietliłasia, što forma raku, na jaki zachvareła biełaruska, dosyć ahresiŭnaja. Jon paśpieŭ pajści ŭ limfavuzły. 11 studzienia 2017 hoda, akramia puchliny, joj vydalili i limfavuzieł. Potym u krasaviku Kaciarynie praviali 33 sieansy apramieńvańnia. I heta dapamahło. I voś užo piać hod raz na paŭhoda jana naviedvaje ankołahaŭ i mamołaha. Pakul situacyja dobraja.
«Doktar skazaŭ, što ja naradziłasia ŭ kašuli, pa idei, ja pavinna była b pryjści da jaho praz hod z apošniaj stadyjaj, ale chvaroba adstupiła», — kaža jana.
Pakul Kaciaryna intensiŭna lačyłasia, jana pisała listy svajoj dačce, ale nie adpraŭlała ich. Tak spraŭlałasia sa stracham.
«Listy z usim maim bolem, pačućciami. Ale ja ich nikoli nie adpraŭlu, bo heta ŭžo prajšło, — ličyć jana. — Mahu skazać, što mianie ratavała viera ŭ boha. Chadziła na spoviedź, raskazała ŭsie svaje hrachi, jakija rabiła ŭ žyćci. Ale viery bieź dziejańniaŭ nie byvaje. Kali vam vielmi drenna, pasprabujcie pajści na vulicu i kamuści prosta dapamahčy. Heta praktyčnaje dziejańnie, jakoje dapamahaje».
«Pakul u nas tolki adna mašyna. Vielmi chaču kupić niekalki i potym naniać kiroŭcaŭ»
Jašče na hrupie ananimnych ałkaholikaŭ Kaciaryna paznajomiłasia sa svaim budučym mužam, jaki jaje vielmi padtrymlivaŭ padčas chvaroby.
«Jon starejšy za mianie na 12 hod, ruski izrailcianin, nie pje ŭžo šeść hod, — raskazvaje žančyna. — I jon byŭ pobač, pakul ja chvareła. Vaziŭ na pracu paśla chimijaterapii, dapamahaŭ».
Paśla taho, jak žančyna pieramahła ałkahalizm i rak, jana vyrašyła, što choča adkryć svoj biznes. I pačała zajmacca hruzapieravozkami. Ciapier razam z mužam jana jeździć za rulom vialikaj fury pa Amierycy. Kaža, što heta ŭžo stała jaje ładam žyćcia.
«Ideja biznesu źjaviłasia, darečy, na hrupach ananimnych ałkaholikaŭ. Tam šmat ludziej, jakija zajmajucca pieravozkami, — raskazvaje jana. — Jany padkazali, i my zacikavilisia. Vyrašyli adkryć svaju kampaniju. Ale tut zdaryłasia pandemija, jakaja dla mnohich była razburalnaj, a dla nas akazałasia dobrym startam. U toj momant amierykanski ŭrad vydzieliŭ małym biznesam srodki na padtrymku. I ŭ nas sabrałasia dobraja suma. My kupili adzin trak, jon kaštavaŭ 125 tysiač dalaraŭ. Adrazu vyrašyli, što budziem zajmacca pieravozkami, tamu što Amieryka pierasoŭvajecca na kołach».
Pa słovach žančyny, u ZŠA adkryć biznes vielmi prosta, kali jość startavy kapitał.
«Rehistracyja zajmaje dva dni. Pakiet dakumientaŭ, jakija patrebnyja, vielmi prosty — pravy kiroŭcy, hrynkarta, apłata za pasłuhu ŭ buchhałtarskaj firmie, — raskazvaje žančyna. — Adkryć kampaniju kaštuje 300-400 dalaraŭ. I składanaściaŭ uvohule nijakich niama, kraina vielmi zacikaŭlenaja ŭ adkryćci małoha biznesu. Prosta treba płacić padatki. Padatak składaje 8% ad prybytku, jaki treba apłačvać raz na hod. Za adzin rejs u zaležnaści ad adlehłaści i samoha rejsa, udajecca zarabić u rajonie 13-15 tysiač dalaraŭ. Pakul u nas tolki adna mašyna. Vielmi chaču kupić niekalki i potym naniać kiroŭcaŭ».
***
Kaciaryna pastupova naładžvaje ŭzajemaadnosiny z dačkoj. Choć, kaniečnie, usio idzie dosyć niaprosta.
«Sioleta paśla siami hadoŭ, mianie dvojčy nazvała mamaj. Ja dačakałasia! Chaj suchija znosiny, ale jany jość, — radujecca jana. — Ciapier ja atrymlivaju asałodu ad žyćcia. Ščaście — heta praces, tamu žyvu ŭ hetym pracesie».