«Vykanaŭca, imavierna, były vajskoviec». Ekśpiert razabraŭ videa padryvu milicejskaj mašyny
Na dniach milicyja i SK adspravazdačylisia pra zatrymańnie čałavieka, jaki padarvaŭ milicejskuju mašynu kala Centralnaha RUUSa Minska ŭ noč z 7 na 8 studzienia. U dadatak apubličyli videa padryvu. Ahułam situacyja vielmi niezvyčajnaja, bo da taho za ŭsiu historyju niezaležnaj Biełarusi «padryŭnikoŭ» było ŭsiaho dvoje — Kanavałaŭ i Sidarakin.
15.01.2022 / 08:08
Jakija vysnovy možna zrabić z prahladu videa? «Naša Niva» pahavaryła z ekśpiertam pa padryŭnoj spravie.
«Toje, što bačna takaja vialikaja kolkaść biełaha dymu, ale siła vybuchu adnosna nievialikaja (pa maich prykidkach, ekvivalentna 200 hram traciła), aznačaje, što rvałasia niešta samarobnaje, a nie vyniesienaja z vajennaj častki vybuchoŭka, — kaža naš ekśpiert. — Takoje možna sabrać u chatnich umovach. Biez ekśpiertyzy skazać što za rečyva, tolki pa videa, niemahčyma».
Ekśpiert adznačaje, što heta «kustarščyna», ale takaja pryłada zmoža lohka nanieści čałavieku surjoznyja paškodžańni. I źviartaje ŭvahu jašče voś na jaki momant.
«Biez peŭnych navykaŭ takoje zrabić nie atrymajecca, — kaža naš surazmoŭca. — Abo čałaviek fanatyk i doŭha vyvučaje litaraturu i praktykujecca (pytańnie — dzie?), abo prachodziŭ śpiecyjalnuju padrychtoŭku, naprykład, padčas słužby va Uzbrojenych siłach.
Na toje, kab navučycca sabrać pryładu takoj mahutnaści z nula, nie majučy navykaŭ, tolki z dasiažnych na rynku materyjałaŭ, pa maich acenkach, treba nu nie mienš za hod.
Važna nie prosta pračytać knihi, ale i pasprabavać materyjały, ichnija praporcyi, umovy zachoŭvańnia, transparciroŭki i hetak dalej.
Ale samaje važnaje heta pryłada inicyjacyi, karaciej — uzryŭnik, — kab jaho sabrać patrebny viedy i realnaja praktyka. Nie kožny vajenny paśla kursaŭ zmoža sabrać uzryŭnik.
Surazmoŭca źviartaje ŭvahu na vialikuju kolkaść vadkich rečyvaŭ u pamiaškańni zatrymanaha, z čaho vyhladaje pytańniem, ćviordaj była vybuchoŭka pad mašynaj, ci vadkaj. Fota: Śledčy kamitet.
Pa tym milhacieńni pad mašynaj pierad vybucham niemahčyma adnaznačna skazać, jakim sposabam zrobleny padryŭ. Praz šnur, jaki haryć, abo heta haryć i reahuje vybuchovaje rečyva pierad vybucham, paśla atrymańnia dystancyjnaha sihnała», — kaža śpiecyjalist.
Mahčymaja datyčnaść zatrymanaha da siłavych struktur vyhladaje imaviernaj. Na heta namiakaje toje, što śledčyja orhany i milicyja nie nazvali ni jahonaha imia, ni pakazali jaho tvaru, što źjaŭlajecca vyklučeńniem pry aśviatleńni padobnych spraŭ.
«Padychod da RUUS z hetaha boku zručny ŭ płanie kanśpiracyi, bo možna padyści praz pryvatny siektar, udalečyni ad zastaŭlenych kamierami mahistralaŭ, — dadaje vajenny. — Z taho boku, dzie stajała padarvanaja mašyna, znachodzicca spartyŭnaja zała i vokny DAI, dzie nočču, pad ranicu, imavierna nikoha nie budzie. Imaviernaść taho, što dziažurny na kamierach u hety čas kiemaryŭ, taksama mocna bolšaja za nul».
Za ŭsiu historyju Biełarusi, vyhladaje, heta treci «padryŭnik». Viadoma, što da taho z vybuchovymi rečami mieŭ spravu asudžany za terakt u mietro Dźmitryj Kanavałaŭ.
Druhi, ale małaviadomy «padryŭnik» — heta były namieśnik Karpiankova ŭ «Ałmazie» Viačasłaŭ Sidarakin, jaki dziesiacihodździe tamu atrymaŭ turemny termin za toje, što słužbovaj vybuchoŭkaj za hrošy demantavaŭ budynki. Na adnym z takich znosaŭ — carkvy pad Biahomlem, — jaho i zatrymali. Ciapier Sidarakin u SIZA pa inšaj spravie.