Zharnuli inšyja źnižki dla piensijanieraŭ. Jak handlovyja sietki ŭvodziać sacyjalny dyskont
Ad siońnia ŭ mnohich kramach pačynaje dziejničać źnižka na sacyjalna značnyja tavary. Daviedalisia, na jakuju maksimalnuju sumu možna zakupicca i jakija akcyi źnikli z-za novaŭviadzieńnia.
17.01.2022 / 15:50
Sacyjalnaja źnižka 10% dajecca piensijanieram, šmatdzietnym siemjam, invalidam, siemjam, jakija vychoŭvajuć dzicia-invalida da 18 hadoŭ, tym, chto štomiesiac atrymlivaje adrasnuju sacdapamohu. Dziejničaje prahrama da 30 červienia.
Pad źnižku padpadajuć takija tavary, jak bulba, jabłyki, chleb, cukar, ćviordyja syry, małako, śmiatana, jajki. Poŭny śpis možna pahladzieć tut.
Maksimalnaja suma, na jakuju možna nabrać tavaraŭ pa sacyjalnaj źnižcy, — 288 rubloŭ na miesiac. Jak nam patłumačyli ŭ «Hipa», na stolki možna zakuplacca ŭ kožnaj handlovaj sietcy asobna. To-bok, kali vy chodzicie, naprykład, u «Jeŭraopt» i «Hipa», to ahułam možacie ŭziać praduktaŭ z sacyjalnaj źnižkaj na 576 rubloŭ.
Takaja źnižka dajecca ŭ 16 handlovych sietkach. Aproč zhadanych, heta, naprykład, «Vitalur», «Santa», «Susiedzi», «Biełmarkiet», «Darors», «Dabranom», «Karona», «Hryn», «Biełkaapsajuz», «Ałmi».
U samich kramach tavary, jakija padpadajuć pad prahramu, nijak śpiecyjalna abaznačacca nie buduć.
Praviły paŭsiul adnolkavyja. Źnižka budzie davacca na kasie. Na ceńnikach ukazanaja cana bieź jaje. Na akcyjonnyja tavary źnižka dziejničać nie budzie. Ź inšymi źnižkami jana nie sumirujecca. Kali tavar z 10-pracentnaj źnižkaj kaštuje nižej sabiekoštu, to jaho pradaduć pa sabiekošcie.
Na dastaŭku praduktaŭ źnižka nie raspaŭsiudžvajecca.
Kab nabyvać tavary pa «sacyjalnych» cenach, treba mieć kartu kramy i paśviedčańnie ci daviedku. Prahramaj mohuć karystacca taksama blizkija svajaki i sacyjalnyja rabotniki. Ale im treba mieć dakumienty, jakija paćviardžajuć svajactva, a taksama paśviedčańnie i kartu kramy taho čałavieka, dla jakoha jany zakuplajucca.
«Vitalur» daje sacyjalnuju źnižku pa zvyčajnaj dyskontnaj kartcy. U «Jeŭraopcie» kartku treba zamianić pa śpiecyjalnuju. Zrobiać heta na praciahu troch dzion. «Santa» afarmlaje sacyjalnuju kartku na praciahu 14 dzion. A ŭ «Hipa» i «Biełmarkiecie» sa źnižkaj daviadziecca pačakać daŭžej, kartku dla piensijanieraŭ tut buduć rehistravać da 21 dnia.
Što cikava, niekatoryja handlovyja sietki zharnuli ŭłasnyja sacyjalnyja prahramy. U «Vitalury» raniej dla šmatdzietnych i piensijanieraŭ była źnižka 3% da 15 hadzin dnia ŭvieś tydzień i 7% — pa paniadziełkach. Ad sumy čeka jana nie zaležała. Ciapier hetych źnižak u kramie niama.
Sietka «Santa» dla ŭraźlivych hrup pa paniadziełkach da 15 hadzin davała źnižku 5%, u astatnija budnyja dni ŭ hety čas — 3%. Paru dzion tamu prahramu zakryli.