Ułady pa danosie admianili kancert pamiaci achviar Chałakostu. A ciapier anansujuć svoj kancert
Z 2018 hoda ŭ Minsku i inšych haradach Biełarusi štohod pravodzili kancerty pamiaci achviaraŭ Chałakostu. Ale sioleta kancert «Žoŭtyja zorki» ŭ minskaj fiłarmonii admianili, nahodaj staŭ danos. Niechta Ivan Nikifaraŭ paskardziŭsia ŭ Ministerstva kultury, što na kancercie vystupajuć «apazicyjajnyja» artysty, a hrošy, atrymanyja ad prodažu biletaŭ, pieradavali Hrodzienskamu dziciačamu chośpisu, jaki nieabyjakavy hramadzianin taksama ličyć apazicyjnym. Admiena kancerta vyklikała niezadavolenaść u dypłamatyčnych kołach Izraila, jaki pryznaje Łukašenku i ŭ adroźnieńnie ad zachodnich krainaŭ, navat viadzie ź im pieramovy. I voś ciapier ułady zapuskajuć svoj kancert pamiaci achviar Chałakostu.
17.01.2022 / 17:36
Fota z kancerta «Žoŭtyja zorki», jaki prajšoŭ letaś u fiłarmonii
Kancert «Žoŭtyja zorki» byŭ zapłanavany na 20 i 22 studzienia, na jaho byŭ zaprošany dyryžor z Aŭstryi, miełasia vykonvacca 13-ja symfonija Dźmitryja Šastakoviča «Babin Jar». Arhanizatarka kancertaŭ Hanna Lańkova — unučka «praviednikaŭ narodaŭ śvietu». Hetaje zvańnie Izrail nadaje tym, chto ŭ Druhuju suśvietnuju vajnu ratavaŭ habrejaŭ.
Alternatyŭny kancert adbudziecca ŭ fiłarmonii 27 studzienia. Udzieł biare dziaržaŭny akademičny simfaničny arkiestr, charavaja kapeła imia Ryhora Šyrmy, dziaržaŭny kamierny arkiestr, chor Biełteleradyjokampanii.
U prahramie tvory Šastakoviča (u tym liku simfonija «Babin jar»), Vierdzi, Błocha, Broniera, Brucha. Košt biletaŭ, niezaležna ad miesca ŭ vialikaj zale, — 10 rubloŭ. Na momant publikacyi vykupili mienš za dziesiać šerahaŭ. Kudy pojduć hrošy ad prodažu biletaŭ, na sajcie fiłarmonii nie ŭdakładniajecca.