Karanavirus dabraŭsia da najvyšejšaj ijerarchii BPC. Siarod zachvarełych i mitrapalit Vienijamin
Jak minimum u troch jepiskapaŭ Biełaruskaj Pravasłaŭnaj Carkvy paćvierdžana zachvorvańnie na COVID-19, paviedamlaje telehram-kanał «Chryścijanskaja vizija».
19.01.2022 / 20:57
Jepiskapy BPC padčas słužby ŭ Žyrovickim manastyry 12 studzienia 2022 hoda.
Siarod zachvarełych i sam mitrapalit Vienijamin. Jon siońnia nie ŭdzielničaŭ u mierapryjemstvach z nahody Vadochryšča, što ŭskosna paćviardžaje infarmacyju kanała.
Tydzień tamu Vienijamin udzielničaŭ u mierapryjemstvach razam z Łukašenkam, kali toj pryznaŭsia, što maje kavidnuju pnieŭmaniju.
Taksama paćvierdžanyja zachvorvańni ŭ adnaho z samych zasłužanych archirejaŭ BPC 77-hadovaha archijepiskapa Pinskaha i Łuninieckaha Stefana i jepiskapa Maładziečanskaha i Staŭbcoŭskaha Paŭła.
Akramia taho, simptomy COVID-19 nazirajucca ŭ archijepiskapa Navahrudskaha i Słonimskaha Huryja.
Apošni raz razam jepiskapy słužyli tydzień tamu, 12 studzienia ŭ Žyrovickim manastyry na dzień pamiaci mitrapalita Fiłareta, jaki pamior hod tamu ad karanavirusa. Antykavidnych mieraŭ zaściarohi ŭ chramie tady nie trymalisia.