Dajšła čarha da «Achovy ptušak Baćkaŭščyny». Arhanizacyju źbirajucca likvidavać
9 lutaha hramadskaja arhanizacyja «Achova ptušak Baćkaŭščyny» atrymała list ad Viarchoŭnaha suda, u jakim paviedamlajecca, što Ministerstva justycyi padało pazoŭ ab likvidacyi APB. Pra heta paviedamili ŭ aficyjnym telehram-kanale arhanizacyi. Pakul hramadzianskaja sprava rychtujecca da sudovaha raźbiralnictva, ale precendentaŭ, kab kamuści ŭ takim vypadku ŭdałosia abaranicca ŭ sudzie, u apošnija paŭtara hoda nie było.
09.02.2022 / 18:35
«Achova ptušak Baćkaŭščyny» — pryrodaachoŭnaja arhanizacyja, jakaja za čverć stahodździa svajho isnavańnia zrabiła vielmi šmat dla taho, kab dzikaja pryroda ŭ Biełarusi zachoŭvałasia i navat dzie-nidzie adnaŭlałasia. Sama arhanizacyja koratka pieraličvaje svaje tolki samyja asnoŭnyja dasiahnieńni:
- Praviali paŭtornaje zabałočvańnie bolš za 17200 ha asušanych tarfianikaŭ;
- Praviali pracu pa nadańni 53-m terytoryjam statusa terytoryj, važnych dla ptušak (TVP), 70% ich płoščy zaraz znachodzicca pad achovaj dziaržavy;
- Paspryjali pavieličeńniu płoščy respublikanskaha zakaźnika «Almanskija bałoty» na 10000 ha;
- Padrychtavali sotni achoŭnych pašpartoŭ i abaviazacielstvaŭ dla redkich vidaŭ i tych, jakija źnikajuć;
- Praviali šmat daśledavańniaŭ, pryrodaachoŭnych mierapryjemstvaŭ dla takich hłabalna pahražalnych vidaŭ, jak vialiki arlec, viartlavaja čarotaŭka, dubalt, jeŭrapiejski vuhor dy inšyja;
- Piać hadoŭ razam z arnitołahami Nacyjanalnaj akademii navuk Biełarusi i vyšejšych navučalnych ustanoŭ pravodzili ŭliki ptušak pa ŭsioj Biełarusi, dadzienyja jakoha ŭklučanyja ŭ Druhi Atłas hniezdavalnych ptušak Jeŭropy;
- Ustalavali tryvałaje partniorstva ź Ministerstvam pryrodnych resursaŭ i achovy navakolnaha asiarodździa, Ministerstvam lasnoj haspadarki, Nacyjanalnym bankam, Biełpoštaj, instytutami i centrami Nacyjanalnaj akademii navuk Biełarusi, inšymi dziaržaŭnymi orhanami i arhanizacyjami.
- Stvaryli reziervat «Turaŭski łuh», jaki staŭ zakaźnikam, i stali pieršaj u Biełarusi niedziaržaŭnaj arhanizacyjaj, jakaja kiruje zakaźnikam;
- Štohod praz pryrodaachoŭnyja akcyi, kampanii, kursy ptuškavańnia pryciahvali dziasiatki tysiač ludziej da vyvučeńnia i achovy dzikaj pryrody, nieśli pryrodaachoŭnuju aśvietu praz sajt, sacsietki i ŚMI.
Za hety čas siabrami arhanizacyi stali bolš za 7000 čałaviek, štohod joj dapamahali achoŭvać pryrodu bolš za 25000 vałancioraŭ i prychilnikaŭ, pa ŭsioj Biełarusi pracavała bolš za 100 školnych kłubaŭ i 14 miascovych adździaleńniaŭ APB.
Z 2005 hoda APB — nacyjanalny partnior hłabalnaj pryrodaachoŭnaj asacyjacyi «BirdLife International», z 1999 hoda — siabra Kaalicyi Čystaja Bałtyka, a ŭ 2021-m była pryniataja ŭ hłabalnuju niekamiercyjnuju arhanizacyju Wetlands International, jakaja zajmajecca zachavańniem vodna-bałotnych uhodździaŭ.
U tekście pazovu Ministerstva justycyi, viadoma, hetyja dasiahnieńni nie zhadvajucca. Tam źviartajecca ŭvaha na inšaje:
«U svaich infarmacyjnych materyjałach dadzienaje hramadskaje abjadnańnie publična vykazvaje ideju pa padtrymańni siarod ludziej pratestnaj aktyŭnaści, vykarystoŭvajučy pry hetym vyraz «Ptuški z narodam».
A jašče:
«Achova ptušak Baćkaŭščyny» pad vyhladam vałanciorstva pa vyratavańni ptušak na terytoryi Respubliki Biełaruś ažyćciaŭlaje ekstremisckuju dziejnaść, nakiravanuju na destabilizacyju hramadska-palityčnaha stanovišča ŭ krainie».
Dyrektar arhanizacyi Alaksandr Vinčeŭski tak kamientuje sumnuju navinu:
«My nie zhodnyja z abvinavačvańniami Miniusta ŭ adras arhanizacyi. Mahčyma, heta marnaja sprava, ale my pasprabujem z advakatam vystupić u sudzie.
Likvidacyja — heta śmierć dla arhanizacyi, ale nie dla jaje siabraŭ i prychilnikaŭ. «Pamirać źbirajsia, a žyta siej». Ja pryśviaciŭ svajo žyćcio achovie dzikaj pryrody i budu jaje achoŭvać u Biełarusi ci za miažoj.
Dobra, kali atrymajecca praciahvać rabić hetuju spravu ŭ Biełarusi razam z vami, našymi paplečnikami».