U Turkmienistanie prezident zajaviŭ, što treba davać darohu maładym. 12 sakavika tam praviaduć pazačarhovyja vybary
Prezident Turkmienistana 64-hadovy Hurbanhuły Bierdymuchamiedaŭ zajaviŭ ab pryniaćci niaprostaha rašeńnia nakont siabie. Pa jaho słovach, na novym etapie raźvićcia krainy darohu patrebna davać maładym kiraŭnikam, zajaviŭ jon padčas pasiedžańnia vierchniaj pałaty parłamienta krainy, paviedamiła ŭ piatnicu Dziaržaŭnaje infarmacyjnaje ahienctva Turkmienistana. Na pasadzie prezidenta Bierdymuchamiedaŭ znachodzicca voś užo treci termin, z 2007 hoda.
12.02.2022 / 10:47
«Voś užo 15 hadoŭ ja pracuju na vyšejšaj i vielmi adkaznaj pasadzie prezidenta Turkmienistana, adnačasova vykonvaju abaviazki staršyni Kabinieta ministraŭ Turkmienistana, staršyni Dziaržaŭnaj rady biaśpieki, Viarchoŭnaha hałoŭnakamandujučaha ŭzbrojenymi siłami Turkmienistana, staršyni Chałk Masłachaty (vierchniaja pałata parłamienta — zaŭv. «NN») Mili Hienhieša Turkmienistana, — skazaŭ Hurbanhuły Bierdymuchamiedaŭ. — Jak vam viadoma, praciahnuŭ kiraŭnik dziaržavy, dva hady tamu ja dasiahnuŭ uzrostu Praroka (63 hady — zaŭv. «NN»). U suviazi z hetym ja abjaŭlaju ab pryniatym dla mianie niaprostym rašeńni.
Ja całkam padtrymlivaju mierkavańnie ab nieabchodnaści adkryć darohu da dziaržaŭnaha kiravańnia na novym etapie raźvićcia našaj krainy maładym kiraŭnikam, vychavanym u duchoŭnym asiaroddzi i ŭ adpaviednaści z vysokimi patrabavańniami sučasnaści. Ja maju namier vykarystać svoj vializny žyćciovy i palityčny vopyt na pasadzie staršyni Chałk Masłachaty.
Z moładdziu my źviazvajem nie tolki našu budučyniu, ale i sučasnaść. Vielič kožnaj dziaržavy vyznačajecca pakaleńniem, jakoje jano ŭzhadavała. Siońnia naša patryjatyčnaja moładź, jakaja vałodaje sučasnymi navukami i viedami, šyrokim dalahladam, prajaŭlaje siabie va ŭsich abłaściach».
Siońnia stała viadoma, što ŭ Turkmienistanie 12 sakavika adbuducca pazačarhovyja vybary prezidenta, paviedamlaje «RIA Novosti» sa spasyłkaj na Centrvybarkam Turkmienistana.
Hurbanhuły Bierdymuchamiedaŭ padčas prezidenctva staŭ hierojem mnohich miemaŭ: jon čytaŭ rep, kidaŭ bieton załatoj rydloŭkaj, pakazvaŭ vajskoŭcam, jak stralać pa mišeniach, jedučy na rovary, i hetak dalej.
Miž tym, jahony adziny syn 40-hadovy Siadar Bierdymuchamiedaŭ staŭ vice-premjeram.