У Мінску пачынаюць рамонт моста на праспекце Жукава, што над чыгункай
18.02.2022 / 11:30
У сталіцы пачынаецца капітальны рамонт пуцеправода на праспекце Жукава над чыгуначнымі рэйкамі. Там ужо ідуць падрыхтоўчыя працы.
З 1 сакавіка там зменіцца схема руху, расказаў «Мінск-навінам» прадстаўнік Гаррамбуда Сяргей Панеў.
Ён дадаў, што цалкам перакрываць мост не будуць, а сустрэчныя патокі будуць рухацца па адной палове пуцеправода, пакуль на другой будуць весці працы.
Першай закрыюць знешнюю частку пуцеправода, з боку ГЦ «Outleto».
Намеснік старшыні Мінгарвыканкама Аляксандр Дараховіч паабяцаў, што мост адрамантуюць у сціслыя тэрміны, каб не ствараць шмат нязручнасцяў для гараджан.
Аднак рамонт ускладняецца з-за размяшчэння пуцеправода над чыгуначнымі рэйкамі. Таму вырашаецца пытанне аб прадастаўленні «вокнаў» для мостабудаўнікоў, гэтае пытанне абмяркоўваецца з прадстаўнікамі Белчыгункі.