Zatrymali doktara Uładzimira Martava. Što viadoma?
abnoŭlena
Viciebskaha ŭrača Uładzimira Martava zatrymali viečaram 22 lutaha na jahonym leciščy pad Lepielem. Blizkija da siamji Martava krynicy raskazali «Našaj Nivie», jak usio zdaryłasia.
23.02.2022 / 11:42
Uładzimir Martaŭ byŭ zatrymany na svaim leciščy: bolšuju častku času jon pravodziŭ tam adzin, žonka žyła i pracavała ŭ Viciebsku.
Padčas zatrymańnia Martaŭ taksama byŭ adzin. Jamu dazvolili pieradać klučy ad lecišča susiedziam. Jany i paviedamili žoncy pra zatrymańnie miedyka.
Žonka pajechała siońnia da Uładzimira ŭ Lepiel u IČU, chacieła pieradać jamu leki. Jon hipiertonik, i hetyja leki patrebnyja jamu pastajanna. Adnak leki pieradać nie dazvolili. «Skazali, kali raptam vašamu mužu stanie kiepska, to vykličam chutkuju dapamohu», — kaža Alena Martava.
Viadoma, što siońnia adbudziecca sud. Doktara Martava abvinavačvajuć u parušeńni artykuła 24.23 KaAP («Parušeńnie paradku arhanizacyi abo praviadzieńnia masavych mierapryjemstvaŭ»). U čym zaklučałasia parušeńnie, pakul infarmacyi niama.
Nahadajem, što były zahadčyk addzialeńnia aniestezijałohii i reanimacyi Viciebskaj balnicy chutkaj dapamohi Uładzimir Martaŭ adnym ź pieršych biełaruskich miedykaŭ adkryta raspavioŭ pra kavid, śmiarotnaść ad jaho, inšyja źviazanyja ź im prablemy.
U sakaviku 2021 jon publična paviedamiŭ pra avaryju na kisłarodnaj stancyi balnicy, u vyniku čaho pamierli niekalki pacyjentaŭ, pra što ni słovam nie paviedamlali dziaržaŭnyja ŚMI. Pravierki nie znajšli vinavatych. A z samim Martavym nie praciahnuli kantrakt.
Z momantu zvalnieńnia jon žyŭ na leciščy, pracavaŭ nad knihaj, dzie chacieŭ asensavać i apisać vopyt baraćby z karanavirusam.
Blizkija kažuć, što adrazu paśla zvalnieńnia Martava klikali na pracu navat u Minsk. Paśla prapanovy pierastali pastupać.
Martaŭ pryncypova nie chacieŭ pakidać Biełaruś. Pry hetym jon praciahvaŭ kamientavać situacyju z karonavirusam, davać kamientary ŚMI. Rodnyja abmiarkoŭvali z Martavym niebiaśpieku hetaha i mahčymaść adjezdu, ale jon kateharyčna admaŭlaŭsia źjazdžać.