U Biełarusi za noč rezka vyraśli ceny na bytavuju techniku i elektroniku
Nočču 24 lutaha rasijskija vojski atakavali Ukrainu. Heta imhnienna adbiłasia na prostych ludziach. Ranicaj u Rasii i Biełarusi pačaŭsia rost koštaŭ dalara i jeŭra, što pryviało da rezkaha rostu cen na niekatoryja tavary. Mabilniki, televizary, ladoŭni — u Biełarusi ŭsio heta pačało daražeć. «Naša Niva» pahladzieła, jak źmianilisia ceny ŭ internet-kramach.
24.02.2022 / 14:04
Dla paraŭnańnia my skarystalisia infarmacyjaj z katałoha «Anłajniera», tam možna prasačyć hrafiki cen na tavary.
Ceny na niekatoryja pazicyi značna vyraśli ŭsiaho za dzień.
Padaražańnie zakranuła ŭ asnoŭnym bytavuju techniku, elektroniku i instrumienty. Košty na meblu nie źmianilisia ci źmianilisia niaznačna (prynamsi, pakul što). Nie padaražali aŭtamabilnyja šyny.
Ale košty na smartfony, kampjutary, televizary irvanuli ŭvierch.
Smartfon iPhone 13 (128 hihabajt pamiaci) padaražeŭ na 300 rubloŭ: z 2320 da 2627. iPhone 13 Pro (z terabajtam pamiaci) — až na 934 rubli. 24 lutaha jon kaštuje 5699 biełaruskich rubloŭ.
Adny z samych papularnych biespravadnych navušnikaŭ Apple AirPods 2 — na 45 rubloŭ (było 362 rubli, stała 407).
Hulniavaja prystaŭka Sony PlayStation 5 kaštavała 2560 rubloŭ. Ranicaj 24 lutaha — ŭžo 3096.
Pralnaja mašyna Bosch WLP20265BL za sutki padaražeła na 200 rubloŭ (z 1078 da 1299 rubloŭ), Bosch WHA222X1BL — na 300 rubloŭ (1199 było, 1499 stała).
Televizar Xiaomi MI TV P1 32» za noč padaražeŭ bolš čym na sto rubloŭ: 23 lutaha jon kaštavaŭ 719 rubloŭ, ranicaj 24-ha — ŭžo 867.
Padaraželi taksama pryntary, šmatfunkcyjanalnyja pryłady (heta pryntar, skanier, kapir u adnym), niekatoryja madeli mikrachvalovak, ladoŭni, niekatoryja madeli pyłasosaŭ i robataŭ-pyłasosaŭ.
Taksama padraśli ceny na instrumienty.
Pierfaratar Bosch GBH 2-26 DFR padaražeŭ z 401 rubla da 449. Šlifavalnaja mašynka «Makita» padaražeła na 20 rubloŭ (245 było, 265 stała).
Košty na rovary nie vyraśli. Ale elektrasamakaty padaraželi. Xiaomi MiJia Electric Scooter M365 Pro, vielmi papularnaja madel, 23 lutaha kaštavała 1108 rubloŭ. 24 lutaha za samakat užo prosiać 1219 rubloŭ.