На наступным тыдні Байдэн можа наведаць Польшчу
Прэзідэнт ЗША Джо Байдэн у рамках магчымай паездкі ў Еўропу на наступным тыдні, верагодна, наведае Польшчу. Зрэшты, ні еўрапейская паездка ў цэлым, ні планы па Варшаве яшчэ не пацверджаныя.
15.03.2022 / 09:11
Спачатку з'явілася інфармацыя аб паездцы Байдэна ў Брусель для сустрэчы з лідарамі краін NATO 23 сакавіка — такую папярэднюю дату называюць тры крыніцы, паведамляе «Украінская праўда».
Са слоў адной з крыніц, Байдэн таксама можа наведаць Польшчу, што павінна стаць дадатковым сігналам салідарнасці з Украінай.
Прэс-сакратар Белага дома Джэн Псакі адзначыла, што фінальных рашэнняў па паездцы яшчэ няма.
Верагодны візіт Байдэна ў Еўропу адбудзецца пасля візіту віцэ-прэзідэнта Камалы Харыс у Польшчу і Румынію на мінулым тыдні.
Трое супрацоўнікаў адміністрацыі заявілі, што некаторыя работнікі, якія займаліся візітам Харыс, засталіся ў Еўропе, каб дапамагчы спланаваць магчымы візіт прэзідэнта ЗША ў рэгіён.