Chronika rejkavaj vajny ŭ Biełarusi-2022. Što viadoma na siońnia
Paśla ŭvarvańnia rasiejskich vojskaŭ va Ukrainu ranicaj 24 lutaha i vykarystańnia biełaruskaj čyhunki ŭva ŭłasnych ahresiŭnych metach šerah biełaruskich inicyjatyvaŭ zajavili ab pačatku supracivu. Siońnia kiraŭnik Ukrainskaj čyhunki Alaksandr Kamyšyn zajaviŭ, što čyhunačnych znosin pamiž Biełaruśsiu i Ukrainaj ciapier nie isnuje. Jon padziakavaŭ za heta sumlennym biełaruskim čyhunačnikam. «Novy Čas» sabraŭ asnoŭnyja fakty pra «rejkavuju vajnu» u Biełarusi.
19.03.2022 / 19:30
Asnoŭnyja viadomyja akcyi «rejkavaj vajny». Infahrafika: «Novy čas»
26 lutaha na pierahonie Viarchi-Viarejcy, a 27 lutaha kala stancyi Barysaŭ byli vyviedzienyja sa stroju prystasavańni aŭtamatyki i telemiechaniki SCB (SCB — prystasavańni sihnalizacyi, centralizacyi i błakavańnia).
28 lutaha na prypynačnym punkcie Siniava kala stancyi Stoŭbcy źniščanaja relejnaja šafa SCB.
28 lutaha na pierahonie Mahiloŭ 2-Bujničy — zakaročvańnie rejkavaha cepu drotam.
1 sakavika na pierahonie Astankovičy-Žerdź źniščanaja relejnaja šafa kiravańnia SCB.
U vyniku pieršaj chvali praviedzienych akcyj, bajučysia dyviersijaŭ, RŽD spyniła tranzit vajennych ešałonaŭ pa terytoryi Biełarusi.
Praz tydzień jak ułady paviedamili, što ŭsie hrupy, datyčnyja da hetych dziejańniaŭ začyščanyja, vajennyja ešałony znoŭ pajechali pa Biełarusi.
U adkaz byli praciahnutyja akcyi.
15 sakavika na pierahonie Damanava-Lasnaja (Bresckaje adździaleńnie) vyviedzieny sa stroju prystasavańnie aŭtamatyki i telemiechaniki SCB, u suviazi z hetym zhas prachadny śviatłafor.
16 sakavika na pierahonie Farynava-Zahaćcie (Viciebskaje adździaleńnie) źniščanaja relejnaja šafa SCB. Praz heta byŭ parušany hrafik pierasoŭvańnia ciahnikoŭ, u tym liku vajennaha pryznačeńnia. Śviatłafory i strełačnyja pieravody nie pracavali.
17 sakavika na stancyi Vorša-Centralnaja z relejnaj šafy byli demantavanyja śpiecyjalnyja transfarmatary, u vyniku ŭnačy nie pracavaŭ śvietłafor.
17 sakavika daradca prezidenta Zialenskaha Alaksiej Arastovič zaklikaŭ da «tatalnaj rejkavaj vajny suprać RF». U kantekście Biełarusi havorka viadziecca pra kirunak Homiel-Kijeŭ.
Da viedama: Relejnaja šafa kaštuje kala 50 tys dołaraŭ, ramontnych kamplektaŭ takich šafaŭ zastalisia adzinki, pa śćviardžeńni zajaŭnikaŭ akcyj.
16 sakavika źjavilisia źviestki pra toje, što rasijskija vojski pieravoziać bojeprypasy ŭ paŭvahonach (paŭvahony ŭ asnoŭnym jeduć nakrytyja tentami), jakija dla hetaha nie praduhledžanyja, što parušaje normy biaśpieki pa pieravozcy niebiaśpiečnych hruzaŭ. Paznačeńniaŭ, što ŭ hrupie vahonaŭ pieravozicca hruz z 1 kłasam niebiaśpieki niama.
Adnačasova da rejkavaj vajny možna zaličyć i kibier-ataku na BČ.
27 lutaha — praviedzienaja masiravanaja ataka na karparatyŭnuju sietku BČ, u vyniku čaho byli vyviedzienyja sa stroju maršrutyzatary. Taksama była sparalizavanaja sistema dyśpietčarskaj centralizacyi «Nioman», na peŭny čas BČ pierajšła ŭ ručny režym kiravańnia. Prahramnaje zabieśpiačeńnie źviazanaje z rucham ciahnikoŭ nie pracavała. Šmatlikija kamputary zastalisia biez padłučeńnia da sietki pradpryjemstva, łahistyčnyja kampanii nie mahli atrymać dostup da asabistych kabinietaŭ.
2 sakavika — druhi etap. Zajaŭlenaja meta: «Zatarmazić pierakid akupacyjnych vojskaŭ i dać ukraincam bolš času na abaronu».
Što, jak zajaŭlena inicyjatarami akcyi, atrymałasia? Daroha pierajšła na peŭny čas u ručny režym kiravańnia, što istotna zapavolvaje ruch ciahnikoŭ, ale nie stvaraje avaryjnych situacyj. Praciahły čas praz kałaps kamputarnaj sietki BČ nie pracavaŭ servis prodažu i vybaru kvitkoŭ anłajn.
Praviedzienaja ataka na sietkavuju infrastrukturu BČ. Nie funkcyjanavali šmatlikija infarmacyjnyja sistemy BČ.
Inicyjatary źviartajuć uvahu, što ŭžo praviedzienyja ŭdzielnikami rejkavyja akcyi nie nieśli ŭ sabie pahrozu dla žyćcia i zdaroŭja biełarusaŭ.
Vajna va Ukrainie praciahvajecca.
Čytajcie taksama: