Выйшлі на волю палітвязні Уладзімір Шынкевіч і Андрэй Гарбуноў
У двух беларускіх палітвязняў днямі скончыліся тэрміны адбывання пакарання і яны выйшлі на волю, паведамляюць праваабаронцы.
21.03.2022 / 22:15
54-гадовы Уладзімір Шынкевіч з Оршы 19 сакавіка цалкам адбыў тэрмін і выйшаў на волю з папраўчай калоніі №22 у Даманаве Івацэвіцкага раёна.
Уладзімір Шынкевіч.
Яго асудзілі на адзін год і тры месяцы калоніі агульнага рэжыму. Па версіі следства, Уладзімір Шынкевіч апублікаваў у сацыяльнай сетцы «Одноклассники» зневажальны пост у дачыненні Лукашэнкі. Што канкрэтна ўтрымлівала публікацыя, невядома, бо справа разглядалася на закрытым судовым паседжанні.
Таксама скончыў адбываць тэрмін і выйшаў на волю палітзняволены Андрэй Гарбуноў з Бабруйска.
Андрэй Гарбуноў.
Ён быў асуджаны да аднаго года «хіміі» за абразу міліцыянта ў Тэлеграме (арт. 369 Крымінальнага кодэкса). Тэрмін адбываў у папраўчай установе адкрытага тыпу №24 у Гродне.