«За тры дні ўжо другі цягнік сышоў з рэек» — фэйк
«У Беларусі поўным ходам ідзе чыгуначная вайна. За тры дні ўжо другі цягнік сышоў з рэек. Цягнік перавозіў вайсковую тэхніку РФ», — такое паведамленне распаўсюджваюць многія ўкраінскія і праўкраінскія тэлеграм-каналы.
31.03.2022 / 12:25
Фота Svaboda.org.
Гэта фэйк. Чыгуначных аварый у Беларусі за час вайны ва Украіне не фіксавалася, акрамя сутыкнення цягніка рэгіянальных ліній з трактарам, які перавозіў гной, пад Мінскам.
Беларусы праводзілі акты сабатажу. На некаторых перагонах былі спаленыя рэлейныя шафы, на іншых — замкнулі дротам рэйкі, тым самым вывелі з ладу сігналізацыю. Пад Стоўбцамі сям'я выцягнула на рэйкі бярвёны. Але гэтыя акцыі запавольваюць рух цягнікоў толькі на некаторы час, не ўплываюць на бяспеку руху.
Няма доказаў, што расіяне абмежавалі перасоўванне сваёй тэхнікі па Беларускай чыгунцы.
Беларускае падполле праводзіла акцыі, якія не нясуць пагрозу сыходу цягнікоў з рэек ці чалавечых ахвяр.
Тым не менш, нават за гэтыя акты сабатажу людзі плацяць доўгімі тэрмінамі турэмнага зняволення, прычым арыштаваных нярэдка катуюць.
Чытайце таксама: «Па супрацоўніках працуе непасрэдна КДБ». Падрабязнасці затрыманняў на чыгунцы
Стала вядома пра арышт не менш за 30 чыгуначнікаў, якія былі звязаныя з дыверсіямі, у розных рэгіёнах Беларусі. Акрамя таго, Камітэт дзяржаўнай бяспекі Беларусі і ГУБАЗіК, структура Міністэрства ўнутраных спраў, якая выконвае функцыі палітычнай паліцыі, за апошнія тыдні арыштавала некалькі дзясяткаў людзей у Мазыры і раёне, у Светлагорску і раёне, у Баранавічах, Стоўбцах і ў Дзяржынску. Мэтамі затрыманняў былі людзі, якія рыхтавалі акты дробнага сабатажу на чыгунцы або перадавалі ў незалежныя СМІ і тэлеграм-каналы інфармацыю аб перамяшчэнні расійскіх войскаў ці пусках ракет па Украіне. За апошняе арыштаваным пагражае да 6 гадоў турэмнага зняволення — такія дзеянні лукашэнкаўцы інтэрпрэтуюць як «дапамогу ў працы экстрэмісцкага фарміравання».
Тым не менш, па інфармацыі аб'яднання былых сілавікоў «Байпол», спецслужбам удалося ўскрыць толькі адну суполку плана «Перамога», у іншых выпадках прайшлі рандомныя затрыманні людзей з апазіцыйнымі поглядамі або грамадска актыўнай моладзі.