«Dziakuj, HUBAZiK, što nadaješ mocy!» Pahutaryli z aktyvistkaj, kvateru jakoj druhi raz raznosiać za deanon siłavikoŭ
Janina Sazanovič — redaktarka «Karnikaŭ Biełarusi» i viadučaja jutub-kanała «Dzikaje palavańnie». Učora kvatera jaje maci stała abjektam pahromu HUBAZiKa. Prytym, što pa hetym adrasie jany ŭžo prychodzili ź pieratrusam amal hod tamu. Tady dom zasypali napaŭnialnikam dla kacinaha tualeta, złamali meblu, na hety raz — uskryli padłohu i prystrašyli, što mohuć zavitać jašče «pa 10 adrasach pražyvańnia svajakoŭ Janiny».
07.04.2022 / 15:50
Raspytali aktyvistku pra reakcyju na čarhovy pahrom doma i pra toje, ci paŭpłyvaje heta niejkim čynam na jaje pavodziny.
Tak vyhladała kvatera Janiny da i paśla sychodu supracoŭnikaŭ HUBAZiKa. U svaim kanale jany nazvali pahrom «kvaternym pytańniem» i ździekliva padpisali videa: «Praviedzienym pieratrusam byli vyrašanyja adrazu try pytańni: ahledzieli kvateru na pradmiet zbroi, narkotykaŭ i inšych zabaronienych pradmietaŭ, vyzvalili jaje ad niezakonnych žycharoŭ, zrabili biaspłatnuju pierastanoŭku».
«Bolš za ŭsio škada płakata z fotazdymkami — padarunka siabroŭki»
Sama Janina nie žyvie ŭ hetaj kvatery z 2019 hoda. Žytło zapisanaje na maci, u samoj aktyvistki majomaści ŭ Biełarusi niama. Na momant prychodu siłavikoŭ u domie nikoha nie było — dźviery ŭzłamali i apiačatali. Pra heta Janina, jak i ŭsie, daviedałasia z tematyčnaha telehram-kanała.
Janina Sazanovič
«Mnie skinuli videazapis pahromu — spačatku ja navat nie chacieła hladzieć, ale ŭ vyniku zrabiła heta. Nu tak, uskryli padłohu. Ale bolš mnie škada płakata z maimi fotazdymkami, jaki šmat hod visieŭ na ścianie, a jaho parvali na kavałki. Ën kaštoŭny tym, što jaho na dzień naradžeńnia padaryła maja siabroŭka pa ŭniviersitecie. Heta było na pieršym kursie — jany drukavała fotazdymki na apošnija hrošy. Tam byli sabranyja ŭspaminy pra toje, što zdaryłasia z nami za hod navučańnia.
Raduje, što maci adreahavała spakojna i badziora, kali ja joj taksama ŭsio prademanstravała. Skazała: «Što my z hetym možam zrabić? Sami jany potym i buduć ramantavać».
Nastupstvy pieršaha pieratrusu
U kvatery žyli znajomyja maci Janiny, paśla taho jak jany z babulaj amal hod tamu źjechali z krainy — ciapier u apiačatanym pamiaškańni zastalisia ich asabistyja rečy, jakija jany nie mohuć zabrać.
«Nie viedaju, jak tak atrymałasia, što maci paščaściła vyjechać ź Biełarusi razam z babulaj litaralna za paru dzion da pieršaha pahromu (vobšukam toje, što jany robiać, nazvać składana — heta pryjści i padnas*ać). U majoj babuli demencyja, joj patrabujecca pastajanny dohlad. Daroha dla ich z maci była ciažkaj i doŭhaj — praź Picier, Ryhu, Estoniju. Na ščaście, usio pieraniesłasia bolš-mienš».
«Niama stolki svajakoŭ u Biełarusi, da jakich pahražajuć pryjści»
Janina choča zajavić publična:
«U mianie niama stolki svajakoŭ u Biełarusi, da jakich pahražajuć pryjści. Moža, niejkija dalokija, ale nastolki, što ja pra ich navat nie viedaju. Jany što, pojduć pa kvaterach ludziej, jakich ja nie viedaju? Ja sama śpiecyjalna ni z kim ź Biełarusi nie kamunikuju, bo razumieju, što heta moža być niebiaśpiečna».
Fota: asabisty archiŭ
«Pomsta za videa na Jutubie»
Z čym moža być źviazanaja novaja chvala ahresii HUBAZiKa ŭ bok Janiny? Dziaŭčyna ŭpeŭnienaja, što heta reakcyja na tematyčnaje videa pra hetaje ŭpraŭleńnie MUS na jaje jutub-kanale «Dzikaje palavańnie».
«Heta pomsta za videa pra ich. Jak ja liču, asabista ad Artura Hajko, jaki byŭ sakretnym ahientam HUBAZiKa niejki čas. My apublikavali nie tolki jaho danyja, ale i jaho žonki. My z kamandaj praviali paraŭnalny analiz i pryjšli da vysnovy, što heta jaho ruka była ŭ videa. Chaču skazać, što na krok siłavikoŭ tak ci inakš budzie novy adkaz z našaha boku».
Kažučy pra kamandu, Janina maje na ŭvazie kala dziesiaci čałaviek. Asnoŭny čas samoj dziaŭčyny sychodzić na jutub-prajekt, Telehram viadziecca bieź jaje zvyškantrolu.
Na pytańnie pra hrošy na isnavańnie adkazvaje:
«Heta nie sakret. Nam vielmi pašancavała: jašče ŭ 2021-m hodzie pryjšoŭ vialiki danat na telehram-kanał, i dziakujučy jamu ja zmahła naniać kamandu. Kaniečnie, hrošy majuć asablivaść zakančvacca, ale my dumajem pra toje, jak vybudavać pracu, kab zarablać samim. Naprykład, zapuścić NFT (nieŭzajemazamienny tokien, adzinka ŭliku, pry dapamozie jakoj stvarajecca ličbavy źlepak dla niejkaha ŭnikalnaha pradmieta, kantentu. — «NN»). U nas jość ideja vypuskać NFT z poŭnymi danymi, naprykład, kadebešnikaŭ, i hetaja infarmacyja nazaŭsiody zastaniecca ŭ suśvietnym pavucińni».
«Dziakuj, HUBAZiK»
Janina kaža, što pahromy i pahrozy ŭ kamientaryjach nie vyklikajuć u jaje strachu, navat naadvarot.
«Paru tydniaŭ tamu ja niešta mocna stamiłasia, bo pracy vielmi šmat, my pracujem 24/7, biez adpačynku. Źjaviłasia dumka: moža, na niejki momant prypynić dziejnaść? Ale ciapier u mianie jašče bolš žadańnia pracavać intensiŭna: jany svaimi pavodzinami nadali mnie mocy. Tak što, dziakuj, HUBAZiK!
I dziakuj tym, chto padtrymlivaje mianie: učora ŭ mianie była takaja chvala padtrymki — stolki nieznajomcaŭ padziakavali za pracu i «pravilnuju spravu»! Na tym ža Jutubie na adzin niehatyŭny kamientaryj zaŭsiody piać pazityŭnych. Heta natchniaje. Jak i toje, što nam praciahvajuć dapamahać ź infarmacyjaj ludzi ź Biełarusi».
U Biełarusi na Janinu zaviedzienaja kryminalnaja sprava: 3-ja častka 130 artykuła KK (raspalvańnie rasavaj, nacyjanalnaj, relihijnaj abo inšaj sacyjalnaj varožaści), ale heta jaje nie spyniaje.
«Ja vielmi chaču viarnucca ŭ svabodnuju Biełaruś, chaču, kab maje dzieci raśli ŭ Biełarusi. Ja lublu svaju krainu. Heta jany robiać u joj anarchiju, a nie my — i jany zasłužyli deanon. Čamu jany vyšturchoŭvajuć usich maich blizkich, siabroŭ? Kažučy «siabry», ja maju na ŭvazie ŭsich biełarusaŭ, jakija ciapier znachodziacca pad represijami. I ja chaču, kab usia naša biełaruskaja siamja viarnułasia dadomu. I budu rabić dla hetaha ŭsio, što ad mianie zaležyć».