U SK ahučyli pretenzii da zatrymanych pa spravie BiełaPAN
Fihurantaŭ spravy BiełaPAN abvinavačvajuć, siarod inšaha, u atrymańni schavanaha finansavańnia ad zamiežnych arhanizacyj na sumu nie mienš za 1 młn 600 tysiač dalaraŭ ZŠA, paviedamlaje SK.
08.04.2022 / 12:22
Byłoha supracoŭnika BiełaPAN Andreja Alaksandrava i Irynu Złobinu, jakaja nikoli nie pracavała ŭ kampanii, zatrymali 12 studzienia 2021 hoda, a dyrektara Irynu Leŭšynu i byłoha hiendyrektara Dźmitryja Navažyłava — 18 žniŭnia.
«Staličnymi śledčymi sabranyja dokazy ab datyčnaści Alaksandrava i Złobinaj da złačynnaj dziejnaści zamiežnaj arhanizacyi BY_help, nakiravanaj na pryčynieńnie škody nacyjanalnaj biaśpiecy Respubliki Biełaruś. Abvinavačanyja brali aktyŭny ŭdzieł u arhanizacyi jaje pracy, vykanańni indyvidualnych zadač pa zbory, pieramiaščeńni, zachoŭvańni i raźmierkavańni hrašovych srodkaŭ», — śćviardžaje SK. Pa najaŭnych u śledstva źviestkach, BY_help patraciła na «finansavańnie ekstremisckaj dziejnaści» nie mienš za 4 miljony dalaraŭ.
Taksama kiraŭniki ahienctva, pa danych śledstva, parušyli padatkavaje zakanadaŭstva: «Alaksandraŭ, Navažyłaŭ, a taksama inšyja asoby z 2015 hoda pa 2021 hod, z karyślivych mierkavańniaŭ, uchililisia ad vypłaty padatkaŭ šlacham utojvańnia, naŭmysnaha zanižeńnia padatkovaj bazy, u tym liku z dapamohaj uniasieńnia ŭ padatkovuju spravazdačnaść zaviedama iłžyvych źviestak, što paciahnuła niavypłatu ŭ biudžet sumy ŭ bujnym pamiery, nie mienš za 449 tysiačy rubloŭ».
SK taksama miarkuje, što nie mienš za 18 zamiežnych arhanizacyj, pačynajučy jašče z 2014 hoda, ažyćciaŭlali schavanaje finansavańnie ahienctva na sumu nie mienš za 1 młn 600 tys. dalaraŭ.
Letaś zamiežnymi abjadnańniami byli vydzielenyja sotni tysiač dalaraŭ na stvareńnie YouTube-kanała, što, jak ličać u SK, «śpiecyjalizavaŭsia na ŭmacavańni destruktyŭnaha i ekstremisckaha nastroju ŭ krainie, a taksama dyskredytavaŭ Respubliku Biełaruś na mižnarodnaj arenie».
Raniej paviedamlałasia, što prakuratura Minska nakiravała ŭ Minski haradski sud kryminalnuju spravu ŭ dačynieńni da supracoŭnikaŭ BiełaPAN.
Im vystaŭlenyja abvinavačvańni pa nastupnych artykułach:
— Andreja Alaksandrava i Irynu Złobinu abvinavačvajuć pavodle č. 2 art. 342 KK u padrychtoŭcy «nie mienš za 260 asob dla ŭdziełu ŭ hrupavych dziejańniach, jakija hruba parušajuć hramadski paradak» z 14 žniŭnia 2020 hoda da 12 studzienia 2021 hoda. Tak traktujecca apłata administracyjnych štrafaŭ, rachunkaŭ za pasłuhi advakataŭ, apłata charčavańnia za čas znachodžańnia ludziej «na sutkach»;
— ich abvinavačvajuć pa č. 1 art. 356 KK ŭ dapamozie ByHelp i jaje pradstaŭnikam u dziejnaści, «nakiravanaj na pryčynieńnie škody nacyjanalnaj biaśpiecy Respubliki Biełaruś»;
Andreja Alaksandrava, Dźmitryja Navažyłava i Irynu Leŭšynu abvinavačvajuć u stvareńni ekstremisckaha farmavańnia ź liku rabotnikaŭ ZAT «BiełaPAN» i inšych asob, a taksama i kiravańnie takim farmavańniem pavodle č. 1 art. 361-1 KK;
Andreja Alaksandrava i Dźmitryja Navažyłava — va ŭchileńni ad vypłaty infarmacyjnym ahienctvam padatkaŭ pavodle č. 2 art. 243 KK RB.