Što za fihurki trymali Zialenski i Džonsan padčas pryjezdu brytanskaha premjera ŭ Kijeŭ? Heta novy ŭkrainski simvał
U sacyjalnych sietkach stała virusnym fota ściany razburanaha doma ŭ horadzie Baradzianka, na jakoj visić kuchonnaja šafa z hlinianaj skulpturaj pieŭnia źvierchu. Šafka z radočkami talerak i dekaratyŭnaj hlinianaj fihurkaj pieŭnia źvierchu — ci nie adzinaje, što acaleła z razburanaj siekcyi doma. Z hetaha naradziŭsia novy simvał, piša BBS.
10.04.2022 / 20:54
Fota Lizaviety Siervatynskaj
Horad Baradzianka byŭ na šlachu nastupleńnia rasijskaj armii na Kijeŭ. Jaho avijacyja abstralała ŭ pačatku sakavika. Była razburanaja bolšaść šmatpaviarchovak na centralnaj vulicy. Rasijskija vajskoŭcy miesiac abstrelvali razburanyja damy, nie dajučy mahčymaści miascovym raźbirać zavały, pad jakimi znachodzilisia ludzi.
Vyratavalnaja apieracyja ŭ Baradziancy praciahvajecca piaty dzień. Z-pad zavałaŭ dastali dziasiatak ciełaŭ žycharoŭ. Raboty praciahnucca jašče nie adzin tydzień.
Simvał ustojlivaści
Kuchonnaja šafka, jakaja zastałasia na ścianie, stała simvałam stojkaści i niepakornaści.
«Budź mocnym, jak hetaja kuchonnaja šafa», — pisali karystalniki ŭ kamientarach pad hetaj fatahrafijaj. A taksama dzivilisia, čym tak mocna haspadar kvatery prymacavaŭ hetuju šafku.
Taksama hetuju fatahrafiju ŭziali za asnovu dla svaich ilustracyj Alaksandr Hrechaŭ i Dzima Kavalenka.
Fota Alaksandra Hrechava
Fota Dzimy Kavalenki
Pieŭnik — simvał pieramohi
Paśla bolš uvažlivyja karystalniki sacsietak razhladzieli, što na šafcy nieparušna staić dekaratyŭnaja hlinianaja skulpturka pieŭnika.
«Hałoŭny hieroj tut — pieŭnik, jaki staić źvierchu na šafie, źleva. Bačycie?» — napisała deputat Kijeŭskaj haradskoj rady Viktoryja Burdukova.
Fota Aksany Dančanka
Aŭtar kieramičnaj fihurki — pradstaŭnik Vasilkoŭskaj škoły kieramiki Prakop Bidasiuk. Jon robić vazy, talerki, cacki i h. d. Jahonyja pracy zachoŭvajucca ŭ Nacyjanalnym muziei ŭkrainskaha narodnaha dekaratyŭnaha mastactva.
«Naša vasilkoŭskaja majolika, krochki tvor skulptara Prakopa Bidasiuka vystajaŭ — acaleŭ i vystajaŭ, i my zmožam!»,— napisała žurnalistka Aksana Dančanka.
Fota Alaŭciny Kachidze
Pieŭnik dla Džonsana i Zialenskaha
Paśla hetaha vypadku pieŭnik staŭ asobnym piersanažam. Padčas vizitu ŭ Kijeŭ brytanskaha premjer-ministra Vialikabrytanii Brrysa Džonsana skulpturka viadomaha na ŭvieś śviet pieŭnika dastałasia i jamu. Hetak ža sama jak i prezidentu Ukrainy Uładzimiru Zialenskamu, razam ź jakim jany hulali pa centru Kijeva.
Ich padaryła Lera Palanskova z Charkava. Jaje sustreča ź lidarami Brytanii i Ukrainy — vypadkovaja, a suvienirnych kieramičnych pieŭniaŭ jana kupiła na padarunak dla siabroŭ z Polščy.
Ciapier fihurki kieramičnych pieŭnikaŭ ukraincy šukajuć na sajtach abjaŭ i ŭ sacsietkach. Taksama ich šukajuć arhanizatary, kab pakazać na ŭkrainskim stendzie na Kirmašy majstroŭ Jeŭropy MIDA 2022 u Fłarencyi ŭ kancy krasavika.