Što skazaŭ kancler Aŭstryi pa vynikach sustrečy z Pucinym
Karł Niechamier zajaviŭ, što pieramovy byli «vielmi pramyja, adkrytyja i žorstkija». Kiraŭnik Aŭstryi byŭ pieršym lidaram krain ES, jaki sustreŭsia z Pucinym paśla pačatku vajny va Ukrainie.
11.04.2022 / 17:51
Niechamier dadaŭ, što vizit nie byŭ siabroŭskim, adnak jon adčuvaŭ patrebu sustrecca z Pucinym, kab pieradać važnaje paviedamleńnie ab tym, što vajna va Ukrainie pavinna skončycca, bo «abodva baki ŭ joj tolki prajhrajuć».
Sustreča praciahvałasia kala hadziny z pałovaj. Jana prajšła biez žurnalistaŭ, pres-kanfierencyi pa vynikach nie było. Pres-sakratar Pucina Dźmitryj Piaskoŭ zajaviŭ, što nijakich aficyjnych zajavaŭ dla presy z rasijskaha boku nie čakajecca.
Kamientujučy taki farmat sustrečy, historyk i palityčny analityk Alaksandr Frydman adznačyŭ u svaim telehram-kanale:
«Kali prezidenta Pucina asabliva turbuje ŭłasnaje zdaroŭje, to kancler Niechamier nadaje pilnuju ŭvahu palityčnaj hihijenie. Aŭstryjskaja presa padkreślivaje, što pierad sustrečaj Pucina i Niechamiera nie pavinna być pratakolnaj zdymki (paciskańnie ruki Pucinu — PR-katastrofa dla luboha jeŭrapiejskaha palityka), a aŭstryjski bok taksama admoviŭsia ad sumiesnaj pres-kanfierencyi, kab nie dać Pucinu mahčymaść ahučyć rasijskija naratyvy.
Charakterna ŭ suviazi z hetym, što Maskva pahadziłasia na taki vielmi źnievažalny farmat sustrečy, pry jakim hość vyrazna pakazvaje haspadaru, što adčuvaje da jaho hidlivaść».
Dva dni tamu Niechamier byŭ va Ukrainie i sustrakaŭsia z Uładzimiram Zialenskim.