Za pieradaču danych pra ruch rasijskaj vajskovaj techniki na Homielščynie raspačata jašče siem kryminalnych spraŭ
Z pačatku hetaha hoda ŭ Homielskaj vobłaści raspačata siem kryminalnych spraŭ z aficyjna farmuloŭkaj «ab sadziejničańni ekstremisckaj dziejnaści, źviazanaj ź pieradačaj administrataram internet-resursaŭ źviestak ab taktyčnych manieŭrach vajskovaj techniki». Siarod padazravanych i niepaŭnaletni chłopiec.
13.04.2022 / 09:31
Fota @Motolkohelp.
Jak paviedamlaje SK, u Chojnickim rajonie 49-hadovaja žančyna pieradavała administrataram antyvajennaha Telegram-kanała infarmacyju ab vidach i maršrutach pieramiaščeńnia vajskovaj techniki.
Mazyrskim rajonnym adździełam Śledčaha kamiteta abvinavačvańnie ŭ sadziejničańni ekstremisckaj dziejnaści pradjaŭlenaje i 28-hadovaj žycharcy Mazyra. Maci małaletniaj dziaŭčynki źniała i pierasłała ŭ telehram-kanał videa ź pieramiaščeńniem viertalotaŭ. Ciapier žančyna znachodzicca ŭ śledčym izalatary.
Miera strymańnia ŭ vyhladzie zaklučeńnia pad vartu prymienienaja i da vučnia prafiesijnaha liceja. Niepaŭnaletni ŭradženiec Mazyra skinuŭ u «ekstremiscki» infarmacyjny kanał videa ź pieramiaščeńniem vajennaj techniki. Jon znachodzicca ŭ statusie abvinavačanaha.
U Homieli 31-hadovy tvorčy rabotnik adpraŭlaŭ antyvajennym kanałam fatahrafii i videafajły ab ruchu transpartnych srodkaŭ vajskovaha pryznačeńnia.
U hetym ža padazrajecca i 37-hadovy homielski taksist.
Dniami fihurantami kryminalnych spraŭ pavodle č. 1 art. 361-4 (sadziejničańnie ekstremisckaj dziejnaści) Kryminalnaha kodeksa Respubliki Biełaruś stali jašče dva žychary Homiela va ŭzroście 44 i 30 hadoŭ.
Rasija napała na Ukrainu 24 lutaha, u tym liku z terytoryi Biełarusi. Hetaje hrubaje parušeńnie mižnarodnaha prava było asudžanaje Hienieralnaj asamblejaj AAN 140 hałasami suprać piaci, siarod hetych piaci i Biełaruś.
U vyniku ahresii zahinuli ŭžo dziasiatki tysiač vajskoŭcaŭ z abodvuch bakoŭ, a taksama mirnych žycharoŭ. Na akupavanych terytoryjach adbyvajucca sapraŭdnyja źvierstvy, ich maštab staŭ viadomy paśla razhromu rasijskich vojskaŭ pad Kijevam.
Zhodna ź mižnarodnym pravam, Biełaruś ličycca saŭdzielnicaj ahresii, bo pradastaviła svaju terytoryju dla viadzieńnia vajny.
Rasijskija vojski prybyli na terytoryju Biełarusi ŭ studzieni-lutym nibyta dla praviadzieńnia vučeńniaŭ, ale, jak vyjaviłasia, płanavaŭsia zachop Ukrainy.