Папа Францішак адклаў сустрэчу з патрыярхам Кірылам
Сустрэча папы Францішка з патрыярхам Маскоўскім Кірылам, запланаваная на чэрвень ў Ерусаліме, не адбудзецца.
22.04.2022 / 15:42
Сустрэча Францішка і Кірыла на Кубе ў 2016 годзе. Фота DPA
«Я шкадую, што Ватыкану прыйшлося адкласці сустрэчу, але наша дыпламатыя прыйшла да высновы, што ў гэтыя дні такая сустрэча магла б прывесці да вялікай блытаніны», — заявіў пантыфік у інтэрв'ю аргенцінскаму выданню La Nacion. Пры гэтым ён запэўніў, што ў Ватыкана «вельмі добрыя» адносіны з Маскоўскім Патрыярхатам.
У сваю чаргу кіраўнік Сінадальнага аддзела знешніх царкоўных сувязяў РПЦ мітрапаліт Іларыён заявіў журналістам, што ў планы пра сустрэчу ўнеслі карэктывы «падзеі двух апошніх месяцаў», паведамляе meduza.io.
Паводле яго слоў «занадта шмат паўстала б менавіта цяпер складанасцяў пры яе падрыхтоўцы» па частцы бяспекі, лагістыкі, асвятлення сустрэчы ў публічнай прасторы. «Будзем чакаць для гэтай падзеі больш спрыяльнага часу».