U Viciebsku sudziać dziaŭčat i chłopca, jakija «pachavali Łukašenku»
Za pierformans na mohiłkach im pahražaje 6 hadoŭ kałonii.
25.04.2022 / 10:38
Heta adzin z epizodaŭ spravy, jakuju pačali razhladać 25 krasavika ŭ sudzie Viciebskaha rajona. Los abvinavačanych budzie vyrašać sudździa Michaił Zubienia.
Sudździa Zubienia
Za roznyja pierfomansy sudziać čaćviorych maładych ludziej: troch dziaŭčat i adnaho chłopca.
Irynie Piarcovaj i Kaciarynie Makarevič pa 27 hadoŭ, Julii Łabunovaj — 34, Arciomu Łatyšavu 29. Usie jany znachodziacca pad vartaj ź vieraśnia 2021 hoda i praviali 7 miesiacaŭ za kratami ŭ čakańni suda.
Źleva naprava: Kaciaryna Makarevič, Arciom Łatyšaŭ, Iryna Piarcova, Julija Łabunova
Što ž takoha ŭčynili hetyja čaćviora?
«Prychilniki ekstremizmu vybirali asabliva cyničnuju i abraźlivuju formu vykazvańnia svaich palityčnych pierakanańniaŭ, pravodzili łakalnyja akcyi, a svaje tak zvanyja «dasiahnieńni» zdymali na videa. Roliki jany publikavali ŭ adkrytym dostupie ŭ internecie dla ŭsieahulnaha prahladu z metaj pryciahnieńnia ŭvahi i farmavańnia masivu pierajmalnikaŭ», — rapartavali śledčyja.
U pierakładzie na čałaviečuju movu: maładzionaŭ zatrymali za amatarskija pierformansy na palityčnyja temy. Svaje dziejańni jany abmiarkoŭvali ŭ zakrytym viciebskim telehram-čacie, tudy vykładvali i videaroliki.
U červieni 2021 jany źniali videarolik, u jakim raźbili biejsbolnaj bitaj kinieskop televizara z naleplenaj fatahrafijaj biełaruskaha dziaržaŭnaha žurnalista. Zapisvali videa, jak palać asobniki dziaržaŭnych haziet.
A ŭ žniŭni 2021 hoda niekatoryja z hetych maładzionaŭ zładzili akcyju na viciebskich mohiłkach. Na adnu z mahił jany pastavili partret Łukašenki i vypili šampanskaha.
Užo praź miesiac udzielnkaŭ pierformansa zatrymali.
«Iryna raniej palitykaj asabliva nie cikaviłasia. Navat u 2015 hodzie, kali nie pamylajusia, uvohule nie hałasavała na prezidenckich vybarach. Zvyčajnaja dziaŭčyna: pracavała ŭ dziciačym sadku. Spačatku była nianiečkaj, paśla vychavalnicaj.
Była zamužam, naradziła dzicia, ale paśla raźviałasia. Dzicia žyło ŭ asnoŭnym z babulaj, maci Iryny. Sama jana žyła asobna», — raskazvaje pra Piarcovu znajomy.
Małoje dzicia jość i ŭ Julii Łabunovaj. Jana pisała ź SIZA:
«Stała malavać, dakładniej, zmaloŭvać. Šaški, tak, hulaju, narešcie spadabałasia. Knihi tut — łuchta poŭnaja, ale čytaju što jość, svaje nielha… Kali ščyra, na NH ŭsio roŭna. Lepš by heta ŭsio chutčej skončyłasia. Ciažka mnie ŭśviedamlać, što dačce pryjdziecca raści biez maci… Tak baluča i strašna. Ale treba trymacca, viedaju».
Viadoma, što prynamsi niekatorych z hetaj kampanii pieršapačatkova zatrymlivali za stvareńnie «ekstremisckaha farmavańnia» ci ŭdzieł u im — majecca na ŭvazie telehram-čat.
«Za Irynaj siłaviki pryjšli prosta na pracu, u dziciačy sadok, tam jaje i zatrymali», — kaža siabar Iryny Piarcovaj.
U zaležnaści ad roli kožnaha maładzionaŭ abvinavačvajuć pa roznych artykułach i epizodach. U spravie fihurujuć artykuły ab chulihanstvie, učynienym hrupaj asobaŭ (art. 339 častka 2 KK), apahańvańni zbudavańniaŭ i psavańni majomaści (art. 341 KK) i «narodny» 342 artykuł KK (udzieł u dziejańniach, jakija hruba parušajuć hramadski paradak). Maładzionam pahražaje da 6 hadoŭ kałonii.