Ułady źniščajuć arhanizacyi niezaležnych prafsajuzaŭ na pradpryjemstvach
U Hrodzienski abłasny sud prakuratura vobłaści nakiravała zajavu ab pryznańni pieršasnaj ahranizacyi niezaležnaha prafsajuza na pradpryjemstvie «Hrodna Azot» ekstremisckaj, zabaronie jaje dziejnaści i likvidacyi, paviedamlajecca na sajcie Hienprakuratury. Padobnyja paviedamleńni prychodziać i ź inšych pradpryjemstvaŭ Biełarusi.
27.04.2022 / 19:10
Fota Viktor Drachev, AP.
U prakuratury zajavili, što praviali pravierku pieršasnaj arhanizacyi Biełaruskaha niezaležnaha prafsajuza rabotnikaŭ «Hrodna Azota» i atrymali źviestki «ab aktyŭnym niepasrednym udziele kiraŭnika i členaŭ pieršasnaj arhanizacyi ŭ sprobie arhanizavać na zavodzie strajk vyklučna ŭ palityčnych metach».
Raniej rašeńniem suda Leninskaha rajona Hrodna infarmacyjnaja pradukcyja tielehram-kanała hetaj arhanizacyi była pryznanaja ekstremisckimi materyjałami. Prakuror Hrodzienskaj vobłaści vynies u adras kiraŭnika pieršasnaj arhanizacyi pastanovu ab prypynieńni jaje dziejnaści.
Na dumku prakuratury, dziejnaść pieršasnaj arhanizacyi niezaležnaha prafsajuza na «Hrodna Azot» supiarečyła patrabavańniam zakanadaŭstva, spałučanaja z raspaŭsiudžvańniem ekstremisckich materyjałaŭ i publičnych zaklikaŭ da zabastovak z vyłučeńniem palityčnych patrabavańniaŭ. Taksama ŭ Hrodzienski abłasny sud nakiravana zajava ab pryznańni pieršasnaj arhanizacyi ekstremisckaj, zabaronie jaje dziejnaści i likvidacyi.
Taksama, pa źviestkach «Našaj Nivy», 25 krasavika rašeńniem Mazyrskaha harvykankama spynienaja dziejnaść Niezaležnaha prafsajuza Mazyrskaha NPZ. Da hetaha na členaŭ prafsajuza akazvaŭsia cisk, rabilisia pahrozy nie padpisańnia kantraktaŭ. Mnohich zatrymlivali, sadžali na 15 sutak, a potym zvalniali za «prahuły».
Nahadajem, što 19 krasavika ŭ centralnych ofisach niezaležnych prafsajuzaŭ u Minsku i ŭ kvaterach aktyvistaŭ ŭ stalicy i rehijonach prajšli pieratrusy. Z 19 pa 21 krasavika byli zatrymanyja minimum 19 pradstaŭnikoŭ niezaležnaha prafsajuznaha ruchu.