Kala 20 tysiač biełarusaŭ pryjechali ŭ sakaviku ŭ Hruziju
U sakaviku 2022 hoda ŭ Hruziju pryjechali amal 20 tysiač hramadzian Biełarusi, bolšaść ź ich tam i zastalisia. Statystyku pierasiačeńnia miažy praanalizavaŭ Tbiliski instytut raźvićcia svabody infarmacyi (IDFI).
28.04.2022 / 18:55
Za sakavik u Hruziju zajechali 19 898 biełarusaŭ. Bolšaść pryjechali praz aeraport u Tbilisi (53%). Admoŭlena va ŭjeździe było tolki 16 hramadzianam našaj krainy, abo 0,08%.
Častka biełarusaŭ, što pryjechali ŭ Hruziju, paśla vyjechali, ale 14 030 čałaviek na kaniec sakavika zastavalisia ŭ Hruzii. U toj čas jak u sakaviku 2019 hoda (da pandemii, pratestaŭ i vajny) kolkaść tych, chto zajechaŭ i vyjechaŭ, była prykładna roŭnaj, a sama kolkaść prybyłych biełarusaŭ była na 555% mienšaj.
Dla paraŭnańnia — za hety ž pieryjad u Hruziju pryjechali 43 152 hramadzianina Rasii i 16 669 — Ukrainy, zastalisia ŭ krainie 17 201 rasijanin i 8151 hramadzianin Ukrainy.
Jak kanstatujuć u instytucie raźvićcia svabody infarmacyi, pryčynaj vybuchovaha rostu kolkaści tych, chto pryjechaŭ u Hruziju, dla rasijan i biełarusaŭ stali rasijska-ŭkrainskaja vajna, palityčnyja represii, a taksama imknieńnie paźbiehnuć sankcyj.
Pa stanu na kaniec sakavika ŭ Hruzii zastavaŭsia 31 231 hramadzianin Rasii i Biełarusi. Ekśpierty ličać heta «surjoznaj prablemaj z punktu hledžańnia biaśpieki krainy».