У беларускім «спісе тэрарыстаў» новае імя. Што вядома пра гэтага чалавека?
На мінулым тыдні ў беларускім «спісе тэрарыстаў» з'явілася яшчэ адно імя — Дзмітрый Нешта. Па версіі КДБ гэты чалавек «датычны да тэрарыстычнай дзейнасці» — з аналагічнымі запісамі, напрыклад, у спіс занесены і лідары апазіцыі. Але што гэта за чалавек?
04.05.2022 / 13:07
Як стала вядома «Нашай Ніве», Нешту 46 год, ён вайсковы пенсіянер — працаваў на 558-м авіярамонтным заводзе, жыве там жа — у Баранавічах. У яго ёсць сын.
Дзмітрыя затрымалі яшчэ ў кастрычніку 2021-га, сваякі не кажуць за што, бо звязаныя падпіскамі аб неразгалошванні. Яго яшчэ не судзілі, ён у следчым ізалятары як абвінавачаны па арт. 289 ч.1 КК РБ.
Імаверна, Нешта праяўляў нязгоду з беззаконнем ад пачатку падзей 2020-га: ён фігуруе ў базе «БЕСпорядкі» як асоба, якая брала ўдзел у баранавіцкай акцыі ў лістападзе 2020-га. Яго затрымалі, але не судзілі: «Праведзена прафілактычная размова, адміністратыўны артыкул не складаўся», — напісана ў базе.