«Z krainy źjazdžajuć tysiačy ludziej z zarpłataj 2500—3000 dalaraŭ». Jak adtok ajcišnikaŭ paŭpłyvaje na ekanomiku
Na ŭčorašniaj naradzie Łukašenka paabiacaŭ nie zakryvać PVT. Ale naŭrad ci heta spynić adtok u IT. Kali situacyja nie źmienicca, praz hod ličba ajcišnikaŭ u Biełarusi moža skaracicca pryblizna na 30 adsotkaŭ, ličyć SIEO adnoj z bujnych kampanij. «Naša Niva» raźbirałasia, jak rełakiejt IT-śpiecyjalistaŭ adabjecca na ekanomicy Biełarusi.
13.05.2022 / 10:56
Pa vynikach 2021 hoda IT-siektar pakazaŭ pryrost
U sakaviku čysty adtok śpiecyjalistaŭ IT — bolš za 1000 čałaviek. Takija źviestki publikuje Biełstat. Upieršyniu z pačatku 2021 hoda kolkaść zvolnienych sa śfiery pieravysiła kolkaść pryniatych na pracu.
Zhodna z krasavickimi vynikami apytańnia BICC, u 43% biełaruskich IT-kampanij pamienšała kolkaść supracoŭnikaŭ, u 42% — zastałasia niaźmiennaj i tolki ŭ 15% kampanij štat pavialičyŭsia. SIEO bujnoj siervisnaj kampanii ŭ kamientaryi dev.by prahnazuje, što kali situacyja nie źmienicca, to praz hod ličba ajcišnikaŭ u Biełarusi skarocicca pryblizna na 30 adsotkaŭ.
Ekśpiert BEROC Kaciaryna Barnukova adznačaje, što realnyja ličby zaŭždy mienšyja za tyja, što publikujucca pa vynikach apytańniaŭ, ale heta nie značyć, što nam niama pra što chvalavacca.
«Pieršaja chvala mihracyi pačałasia jašče ŭ kancy 2020 hoda, kali ajcišniki stali davoli masava pakidać Biełaruś praz paślavybarčyja padziei. Jašče tady mierkavałasia, što ahulnaja kolkaść śpiecyjalistaŭ u krainie pamienšaje, ale pa vynikach 2021 hoda hety siektar usio adno pakazaŭ pryrost.
Adnak tut treba razumieć, što ahulny pryrost ajcišnikaŭ jašče nie kaža pra toje, što nichto nie źjazdžaŭ. Prosta ŭ prafiesiju prychodziła šmat novych ludziej, u pieršuju čarhu ź liku vypusknikoŭ VNU. Kožny hod u IT prychodziła kala dziesiaci tysiač čałaviek, i hetyja ličby raśli z hoda ŭ hod. Adnak heta nie admianiaje taho, što niedzie 5—10 tysiač śpiecyjalistaŭ ź IT-śfiery źjechali ź Biełarusi praz palityčnuju situacyju ŭ krainie», — kaža Kaciaryna Barnukova.
Rełakiejt abo zvalnieńnie
Pry hetym ekanamistka źviartaje ŭvahu na toje, što situacyja da pačatku vajny i paśla istotna adroźnivajecca. Kali raniej rašeńnie ab pierajeździe prymali sami supracoŭniki, to ciapier da hetaha ich usio čaściej schilajuć pracadaŭcy.
Fota: Instahram Epam
«Ciapier ludzi časta apynajucca ŭ situacyi, kali treba abirać: pahadzicca na rełakacyju abo zastacca biez pracy. Da hetaha dadajucca aściarohi niepasredna źviazanyja z vajnoj, tamu biahučaja situacyja mocna roźnicca ad toj, jakuju my nazirali da 24 lutaha».
Sami IT-kampanii časam vymušana iduć na rełakiejt, bo hetaha vymahajuć zakazčyki.
Zhodna z vynikami apytańnia, 22% respandentaŭ adznačajuć, što klijenty admaŭlajucca pracavać ź biełaruskimi jurydyčnymi asobami. 21% zajavili, što zamiežnyja klijenty patrabujuć rełakavać raspracoŭščykaŭ ź Biełarusi. Mienš za tracinu adznačyli, što zamiežnyja klijenty pracujuć ź imi ŭ raniejšym režymie i tolki 22% kampanij nie płanujuć navat častkovaj rełakacyi ź Biełarusi.
Tym nie mienš, ahučanyja ličby skaračeńnia na 30% ciaham hoda, Kaciaryna Barnukova nazyvaje małaimaviernymi.
«Miarkuju, što kali situacyja nie źmienicca, to my zmožam kazać pra skaračeńnie IT-siektara na 10—20 pracentaŭ. Adnak navat takija ličby źjaŭlajucca vielmi istotnymi i adčuvalnymi dla ekanomiki. Bo kali raniej IT-siektar štohod pakazvaŭ pryrost na 7—10 %, to za biahučy hod jon dakładna nie vyraście, i całkam vierahodna, što pakaža padzieńnie».
IT byŭ drajvieram rostu ekanomiki
Dola IT-siektara ŭ Biełarusi składaje kala 5% ad VUP, jakija vyrablajucca siłami kala sta tysiač čałaviek, to-bok hetaja halina maje vybitny KKD. Kab lepiej razumieć: 5% ad VUP — heta prykładna toje, što my majem ad sielskaj haspadarki, i navat bolš, čym nam daje naftapierapracoŭka.
«Ekspartnaja vyručka IT supastaŭnaja z ekspartnaj vyručkaj taho ž «Biełaruśkalija». Aproč hetaha, varta adznačyć, što za apošnija dziesiać hadoŭ kala pałovy rostu ekanomiki Biełarusi zabiaśpiečvałasia mienavita dziakujučy raźvićciu IT-haliny. IT zastajecca adnym ź niamnohich drajvieraŭ biełaruskaj ekanomiki», — adznačaje ekanamistka.
U vyniku masavaj rełakacyi ajcišnikaŭ i IT-kampanij ź Biełarusi svaje hrošy niedaatrymaje nie tolki biełaruski biudžet, ale i biznes.
«Siaredni zarobak biełaruskich ajcišnikaŭ maje siaredniejeŭrapiejskija pakazčyki i vahajecca ŭ miežach 2500—3000 dalaraŭ. Vynikaje, što kraina hublaje tysiačy ludziej, čyj zarobak u 5-6 razoŭ vyšejšy za siaredni pa krainie. Praz heta pacierpić nie tolki biudžiet, jaki niedaatrymaje hrošy ŭ vyhladzie padatkaŭ i adličeńniaŭ u FSAN, ale, naprykład, i śfiera pasłuh, jakaja mocna raźviłasia za apošnija piać hadoŭ, u tym liku dziakujučy tamu, što ŭ krainie źjaŭlałasia ŭsio bolš płaciežazdolnych ludziej.
Tamu ad hetaha ŭ peŭnaj miery pacierpiać usie, pačynajučy ad klininhavych kampanij, pryvatnych dziciačych sadkoŭ i škoł, da kaviarniaŭ i taksi. Bo hetyja tysiačy ludziej z dobrymi zarobkami, buduć tracić svaje hrošy ŭžo nie ŭ Biełarusi, a za jaje miežami», — adznačaje ekanamistka.
Ofisnyja budynki ŭžo pustujuć
Navat z ulikam taho, što vajna va Ukrainie i vyklikany joj rełakiejt ajcišnikaŭ pačalisia tolki dva z pałovaj miesiacy tamu, u Biełarusi ŭžo źjavilisia śfiery, na jakija hetaja źjava paśpieła akazać niehatyŭny ŭpłyŭ.
«Praces rełakacyi pačaŭsia jašče dva hady tamu, a ciapier jon tolki paskoryŭsia. Cełyja ofisnyja budynki, pabudavanyja pad IT, pustujuć. Ale pakul daloka nie ŭsie kampanii całkam rełakavalisia, tamu pracess apuścieńnia budzie raściahnuty ŭ časie», — adznačajuć na rynku nieruchomaści.
Miarkujecca, što bolš dakładna acanić maštaby možna budzie bližej da kanca leta.
Na žyłoj nieruchomaści hety praces pakul asabliva nie adbiŭsia.
«Kvatery na prodaž jany jašče masava nie vystaŭlajuć, a zabudoŭščyki nie raskazvajuć, nakolki jany ciapier zapatrabavanyja ci nie zapatrabavanyja ajcišnikami.
Adzinaje, što možna adznačyć — heta źnižeńnie cen na abjekty, jakija budujucca ŭ rajonach, što tradycyjna karystalisia popytam u ajcišnikaŭ. Prynamsi, pa hetym možna mierkavać, što popyt na žyllo siarod płaciežazdolnaha nasielnictva surjozna prasieŭ», — kaža adzin sa śpiecyjalistaŭ rynku nieruchomaści.