U Biełarusi — novy antyrekord naradžalnaści. Takija padliki zrabili žurnalisty pry maksimalna zakrytaj statystycy
Niekalki miesiacaŭ tamu Biełstat apublikavaŭ danyja pa kolkaści nasielnictva, ź jakich stała viadoma, što biełarusaŭ u 2021-m stała mienš na 94,1 tysiačy. Ale za košt čaho heta zdaryłasia, dakładna nie viadoma, bo jašče raniej pierastali vypuskać danyja pa naradžalnaści, śmiarotnaści i mihracyi. Da niadaŭniaha času publikavałasia struktura nasielnictva, ź jakoj možna było vyličyć, naprykład, infarmacyju pra naradžalnaść. Ale ciapier i hetaja infarmacyja stała zakrytaj. Kab daviedacca, jakaja letaś była situacyja z naradžalnaściu, žurnalisty «Zierkała» zrabili svoj analiz. Ich vysnovy: u Biełarusi ŭstanoŭleny novy antyrekord — u krainie naradziłasia mienš za 80 tysiač niemaŭlat.
13.05.2022 / 08:32
Fota: pixabay.com
Statystyka stanovicca ŭsio bolš zakrytaj, ale siakuju-takuju infarmacyju možna vyličyć.
U Biełarusi pierastali publikavać połaŭzrostavuju strukturu nasielnictva ŭ raźbiŭcy pa ŭzroście. Heta značyć, ciapier niama pramoj mahčymaści daviedacca, kolki letaś u krainie było čałaviek va ŭzroście, naprykład, 55 poŭnych hadoŭ abo niemaŭlat da hoda. Zbornik, u jakim hetaja infarmacyja zvyčajna znachodziłasia, publikavacca nie budzie, paviedamili ŭ Biełstacie žurnalistu, jaki patelefanavaŭ u viedamstva jak pryvatnaja asoba. A ŭ bazie danych Biełstata infarmacyja jość tolki ŭ raźbiŭcy pa hrupach pa piać hadoŭ — naprykład, kolkaść dziaciej va ŭzroście 0-4 hady, 5-9 hadoŭ, 10-14 hadoŭ.
Čamu heta važna? Z 2020 hoda Biełstat nie publikuje danyja pa naradžalnaści (jak i pa śmiarotnaści). A infarmacyja pa hadavych hrupach nasielnictva była prostym sposabam vyličyć prykładnuju kolkaść narodžanych za hod.
Ale pakul u statystycy jość inšyja danyja, pa jakich možna zrazumieć, kolki prykładna ŭ Biełarusi ŭ minułym hodzie naradziłasia čałaviek. Vyvučyŭšy ich, žurnalisty pryjšli da vysnovy, što letaś, pavodle ich padlikaŭ, u krainie naradziłasia kala 79,4 tysiačy dziaciej. Heta najnižejšy pakazčyk za ŭsiu historyju niezaležnaści Biełarusi.
Vysnovy: za dva apošnija hady praciahnuŭsia trend na źnižeńnie naradžalnaści. U 2020 hodzie jana skaraciłasia na 4,1% i ŭ 2021 ‒ na 5,5%. Upaŭ i ahulny kaeficyjent naradžalnaści (heta kolkaść naradžeńniaŭ na 1000 čałaviek nasielnictva). Zychodziačy z atrymanych danych, jon taksama apynuŭsia na histaryčnym minimumie — 8,53 naradžeńnia na tysiaču žycharoŭ. Nie tak daŭno, u 2016 hodzie, jon byŭ 12,4, a papiaredni histaryčny minimum (8,55 naradžeńniaŭ na tysiaču čałaviek) byŭ u 1997 hodzie.
Jak žurnalisty viali padlik, možna pahladzieć tut.