Зняволенаму рэдактару «Ежедневника» выставілі абвінавачванні па новых артыкулах
Рэдактару «Ежедневника» Сяргею Сацуку, які быў затрыманы 8 снежня мінулага года, выставілі абвінавачванні па яшчэ двух артыкулах крымінальнага кодэкса.
09.06.2022 / 17:22
Раней яго вінавацілі ў атрыманні хабару. Нядаўна скончыўся максімальна магчымы тэрмін утрымання Сяргея пад вартай па гэтым артыкуле. І літаральна некалькі дзён таму Сацук паведаміў у лісце з СІЗА пра новыя абвінавачванні.
Цяпер Сяргея вінавацяць яшчэ і ў распальванні варажнечы (арт. 130 КК) і перавышэнні ўлады альбо службовых паўнамоцтваў (арт. 426 КК). Якіх канкрэтна дзеянняў рэдактара тычацца абвінавачванні, невядома.
Сяргея Сацука затрымалі 8 снежня мінулага года па ранейшай справе аб нібыта атрыманні хабару. У той дзень дома ў журналіста прайшоў чарговы ператрус, а самога Сяргея змясцілі ў СІЗА. Праваабаронцы прызналі Сяргея Сацука палітычным вязнем.