Krynicy: Minsk nie płacić Rasii za haz. Trapiŭ u pastku, jakuju sam pastaviŭ
Jak stała viadoma «Našaj Nivie», Biełaruś zatrymlivaje płaciažy Rasii za haz. Pryčyna — štučny rost kursa rasijskaha rubla zrabiŭ canu vyšejšaj, čym płanavałasia. Dla Biełarusi cana vychodzić zavysokaj.
20.06.2022 / 14:19
Pa kantrakcie z «Hazpromam» Biełaruś pavinna była płacić za haz z raźliku $128 za tysiaču kubamietraŭ.
Heta vielmi vyhadnaja cana, prykładna ŭ dva-čatyry razy nižejšaja, čym u studzieni-lutym płacili pa doŭhaterminovych kantraktach hazavyja kampanii inšych krain. Reč u tym, što dla Biełarusi hetaja cana fiksavanaja, tady jak častka kampanij kuplaje pa canie, pryviazanaj da kacirovak nafty. Ale navat siarod tych, kamu «Hazprom» pradaje błakitnaje paliva pa fiksavanych cenach, ni ŭ koha niama takoj vyhadnaj cany, jak u Biełarusi.
Adnak Minsk trapiŭ u pastku, jakuju sam pastaviŭ. U palityčnych metach biełaruskaja administracyja doŭhi čas dabivałasia pierachodu na płaciažy za enierhanośbity ŭ rasijskich rublach. Paśla pačatku vajny rašeńnie ab pierachodzie na apłatu ŭ rublach było pryniataje. Ale nie tolki dla Biełarusi, Maskva zapatrabavała taho ž ad hazavych kampanij Jeŭrasajuza. Pry hetym Rasija štučna padniała kurs rasijskaha rubla jak da dalara, tak i da jeŭra i biełaruskaha rubla.
Ciapier rasijski rubiel kaštuje 56 rubloŭ za dalar, rynkavy kurs składaŭ by, mahčyma ad 80 da 120. Kamfortny dla Biełarusi — 75—80, jakim jon byŭ da 24 lutaha, dnia napadu na Ukrainu.
«Minsk nie pravodzić płaciažy pa biahučym kursie: zrobiš adzin tranš — i ŭsie astatnija prydziecca rabić pa ŭmovach pieršaha, takaja palityka Hazprama», — kaža abaznanaja krynica.
Atrymlivajecca, ciapier za haz Biełarusi daviałosia b addać bolš dalaraŭ abo rubloŭ, čym raniej zakładvałasia. Tamu Minsk nie płacić, vyčekvaje, pakul rubiel asłabieje, abo pakul nie ŭdasca źmianić formułu cany ŭ pahadnieńni.
«I rubiel umacoŭvajecca šalonymi tempami — kab my tut nie pierabarščyli. Niečakanyja rečy adbyvajucca», — kinuŭ Alaksandr Łukašenka pierad telekamierami na sustrečy z Uładzimiram Pucinym 23 maja ŭ častcy, pryśviečanaj pierachodu na raźliki ŭ nacyjanalnych valutach.
«Pakul tarhujucca», — paviedamiła «Našaj Nivie» abaznanaja krynica.
Raniej vice-premjer Juryj Nazaraŭ zajaŭlaŭ TASS, što «ŭ nas pieršaje paŭhodździe — adpracavać miechanizm farmiravańnia cany [na haz] u ramkach Sajuznaj dziaržavy».
U historyi enierhietyčnych uzajemaadnosin Biełarusi i «Hazproma» ŭžo zdaralisia situacyi, kali baki nie mahli damovicca ab canie hazu. Paśla torhu, časam praciahłaha, zaŭsiody znachodziłasia ŭzajemaprymalnaje rašeńnie.