Zialenskaha ŭvieś čas supravadžaje hety achoŭnik. Voś što pra jaho viadoma
Były kamiedyjny akcior, a ciapier prezident Ukrainy Uładzimir Zialenski niečakana, vidać, navat dla samoha siabie staŭ adnym z samych upłyvovych i aŭtarytetnych ludziej śvietu. Pakolki jon prezident dziaržavy ŭ stanie vajny, jahonaj biaśpiecy nadajuć vielizarnuju ŭvahu. Nad achovaj Zialenskaha pracujuć dziasiatki, a to i sotni ludziej. Ale adzin ź ich — uvieś čas pobač z prezidentam. Chto taki Maksim Daniec, jaki achoŭvaje Zialenskaha ź pieršych dzion prezidenctva?
23.06.2022 / 21:12
Daniec supravadžaje Zialenskaha i Džonsana ŭ Kijevie. Fota: Ofis prezidenta Ukrainy
Pra Danca, jaki i pra luboha achoŭnika kiraŭnika luboj dziaržavy, viadoma nie tak šmat. Upieršyniu na jaho źviarnuli ŭvahu ŭ 2019 hodzie, kali Zialenski tolki pačynaŭ svaju palityčnuju karjeru.
Maksim Daniec da 2019 hoda viadomy jak adzin z pastajannych asabistych achoŭnikaŭ aliharcha Ihara Kałamojskaha. Pobač ź Zialenskim Danca stali zaŭvažać z samaha pačatku jaho vybarčaj kampanii. Tak, u lutym 2019 hoda ciełaachoŭnik Kałamojskaha supravadžaŭ tady jašče kandydata ŭ prezidenty Zialenskaha ŭ Lvovie.
Daniec supravadžaje Kałamojskaha.
Tady heta vyklikała šmatlikija aściarohi adnosna mahčymaj zaležnaści palityka ad aliharcha.
Voś jak tłumačyŭ sam Zialenski toj fakt, što karystaŭsia achovaj aliharcha.
«U nas kantrakt, kantrakt z punktu hledžańnia kampanii, jakaja zajmajecca achovaj, jakaja zajmajecca biaśpiekaj. Voś i ŭsio. Andrej Bohdan (juryst Ihara Kałamojskaha, jaki paźniej kiravaŭ Ofisam prezidenta Ukrainy — NN) — adna z troch kampanij — jon tam adzin z kampańjonaŭ, ja nie viedaju, ułasna kažučy, usiu sistemu całkam, chto ź ich tam kampańjon, chto haspadar hetaj kampanii. Jość try kampanii, jakija zajmajucca jurydyčnym supravadžeńniem našaj partyi, našaj kamandy. Voś i ŭsio», — tłumačyŭ tady Zialenski.
Viadoma, što achovu Kałamojskaha zabiaśpiečvała kampanija SecureIT. Adzin ź jaje suzasnavalnikaŭ — «Ukrnafta» Kałamojskaha. Druhi — Aleh Šajchiet, u minułym jašče adzin achoŭnik Kałamojskaha. Aleh Šajchiet — baćka načalnika palicyi Mikałajeŭskaj vobłaści Siarhieja Šajchieta i jaho brata Ihara Šajchieta, kiraŭnika pryvatnaj inkasatarskaj kampanii.
Paśla druhoha tura vybaraŭ, u krasaviku 2019 hoda, Zialenski razam ź siamjoj pajechaŭ na adpačynak u Turcyju. Tam jaho sustreli rasijskija prapahandysty, i mienavita Daniec vymušany byŭ achoŭvać Zialenskaha ad nadakučlivych rasijan.
Daniec adhaniaje rasijskich prapahandystaŭ.
Zialenski ŭ pieršyja ž dni svajho prezidenctva zrabiŭ Danca kiraŭnikom svajoj Słužby biaśpieki.
Viadoma pra Danca niašmat. U jaho jość žonka Natalla i syn Maćviej. U dekłaracyi za 2018 hod paznačałasia, što svajho žylla ŭ Maksima Danca niama, ale jość prava na pražyvańnie ŭ internacie vajskovaj čaści, a taksama ŭ dźviuch baćkavych kvaterach u Vyšharadzie (Kijeŭskaja vobłaść) płoščaj 140 i 42 kvadraty. Taksama paviedamlałasia, što ŭ Danca jość mašyna 2011 hoda.
Daniec padčas sustrečy Zialenskaha i Łukašenki. Fota: Ofis prezidenta Ukrainy.
U kancy sakavika Zialenski prysvoiŭ svajmu achoŭniku zvańnie bryhadnaha hienierała.
Viadoma, Daniec — daloka nie adziny achoŭnik Zialenskaha. Nad achovaj ukrainskaha prezidenta pracujuć zaraz dziasiatki, a mahčyma, i sotni ludziej.
Admietna, što minułych prezidentaŭ Ukrainy achoŭvali ad 10 da 15 čałaviek, a voś Zialenski jašče da vajny pavialičyŭ prezidenckuju achovu ŭ razy. U pryvatnaści, u kancy 2021 hoda stała viadoma, što tolki ŭ pieršym kalcy Zialenskaha achoŭvajuć kala 70 čałaviek, akramia hetaha, na pierymietry stajać ludzi z raźviedki i pieradavyja hrupy. Całkam imavierna, što z pačatkam vajny kolkaść jak achoŭnikaŭ, tak i struktur, zadziejničanych u achovie Zialenskaha, istotna ŭzrasła.
Z 2019 hoda Zialenski žyvie ŭ atmaśfiery pastajannych sihnałaŭ pra niebiaśpieku jahonamu žyćciu, i z pačatkam vajny hetyja aściarohi tolki ŭzmacnilisia.
Zachodnija raźviedki paviedamlali, što Maskva płanavała ažyćciavić u lutym 2022-ha fizičnuju likvidacyju kiraŭnikoŭ ukrainskaj dziaržavy. Ukrainskija siłaviki zajaŭlajuć, što im udałosia praduchilić niekalki sprob zabojstva Uładzimira Zialenskaha.