U knizie Bahdanoviča ŭ SIZA vyrvali staronku z «Pahoniaj»
Palitviaźniu Anatolu Łatušku nie pieradajuć listy z vieršam «Pahonia», paviedamlaje «Viasna».
28.06.2022 / 11:58
45-hadovy Anatol Łatuška — stryječny brat palityka Paŭła Łatuški. Jaho zatrymali ŭnačy 31 studzienia 2022 hoda.
Papiarednie, jamu staviać u vinu č. 2 art. 339 KK (chulihanstva) za malavańnie praz trafarety «Pahoni» i art. 370 KK (abraza dziaržaŭnych simvałaŭ). Viadoma, što paśla zatrymańnia Anatola mocna źbili.
U liście ad 16 červienia Anatol raspavioŭ, što vierš «Pahonia», jaki jamu dasłali z voli, jamu tak i nie addali. U bibłijatecy SIZA-1 jon uziaŭ knihu z tvorami Maksima Bahdanoviča, ale ŭ joj nie chapaje mienavita tych staronak, na jakich pavinien być hety vierš. Taksama jon dziakuje za fotazdymki pryrody, bo ŭ turemnym dvoryku im bačny tolki viarchuški drevaŭ.
Padtrymajcie palitviaźnia pasyłkami, hrašovymi pieravodami, telehramami i listami salidarnaści: SIZA-1. 220030, h. Minsk, vuł. Vaładarskaha, 2, Anatol Viktaravič Łatuška.
Nahadajem, što vierš pačynajecca tak:
Tolki ŭ sercy tryvožnym pačuju
Za krainu radzimuju žach,
Uspomniu Vostruju Bramu śviatuju
I vajakaŭ na hroznych kaniach.
U biełaj pienie pranosiacca koni,
Rvucca, mknucca i ciažka chrypiać
Staradaŭniaj Łitoŭskaj Pahoni
Nie raźbić, nie spynić, nie strymać.