Jak pracujuć snarady SMArt, jakija dajuć Ukrainie vialikuju pieravahu VIDEA
Ukrainski bok kaža, što pieradača hetych bojeprypasaŭ — vialiki krok napierad. Razabralisia, jak jany pracujuć i čym admietnyja.
07.07.2022 / 20:44
Hetyja snarady — novaje pakaleńnie bojeprypasaŭ dla stvolnaj artyleryi, a ŭ armii Hiermanii hetyja bojeprypasy źjavilisia tolki ŭ 2000 hodzie. Hienieralny štab USU prademanstravaŭ źniščeńnie takim bojeprypasam zienitnaha rakietna-harmatnaha kompleksu «Pancyr-S1».
Prymianieńnie snarada suprać «Pancyra». Videa: Uzbrojenyja siły Ukrainy
Jak pracujuć snarady z samanaviadzieńniem SMArt
Kožny snarad SMArt 155 (Suchzünder-Munition für die Artillerie, subbojeprypasy dla artyleryi) składajecca z dvuch subbojeprypasaŭ.
Schiema snarada. Tam pakazanyja (źleva naprava): apornaja płaścina, pryvadnaja hrupa, zadni snarad, piaredni snarad, vykidny kupał, tankaścienny korpus abałonki, trubka z zaradam dla vykidu, časavy ŭzryvalnik.
Spačatku 155-milimietrovaja harmata vystrelvaje snarad (1). Snarad lacić pa balistyčnaj duzie z dalokaściu 27,5 kiłamietraŭ (2). U siaredzinie palotu tajmierny ŭzryvalnik padpalvaje nievialiki vykidny kupał u nasavoj častcy, jakaja vyciahvaje dva subbojeprypasy z korpusa snarada (3).
Schiema pracy SMArt. Punkty pakazanyja ŭ tekście dužkami. Fota: wikipedia.org
Korpus i nasavaja častka adpadajuć (4). Kožny z subbojeprypasaŭ abstalavany hałoŭkaj samanaviadzieńnia i na parašucie pavolna spuskajecca ŭniz.
Pry źnižeńni subbojeprypas krucicca, skanujučy terytoryju z dapamohaj šmatčastotnych infračyrvonych i radyjołakacyjnych datčykaŭ, jakija paraŭnoŭvajuć vyjaŭlenyja transpartnyja srodki z prahramavanaj celevaj bazaj źviestak (5). Spałučeńnie sensaraŭ dazvalaje vykarystoŭvać snarad pry lubych umovach nadvorja i ŭ luby čas sutak, a taksama ihnaravać miery maskiroŭki celaŭ.
Jak tolki cel zachoplenaja — subbojeprypas vybuchaje ŭ pavietry, vystrelvajučy tak zvanaje «ŭdarnaje jadro» (6). Heta razahnany na chutkaść bolš za 18 tysiačaŭ kiłamietraŭ u hadzinu elemient, jaki moža prabić bolš za sto milimietraŭ brani na adlehłaści ŭ niekalki sotniaŭ mietraŭ.
Schiema raboty zaradu. Fota: wikimedia.org
Bojehałoŭka SMArt zabiaśpiečvaje dastatkovuju pranikalnuju zdolnaść dla nadziejnaha paražeńnia lubych bajavych siarednie— i ciažkabraniravanych mašynaŭ na poli boju.
Admietnaść jašče i ŭ tym, što treba viedać tolki kaardynaty bazavańnia celi. To-bok zadača navodčykaŭ — uvieści patrebnyja kaardynaty, a astatniuju pracu biare na siabie sistema naviadzieńnia snaradaŭ.
Kolkaść užo zroblenych takich snaradaŭ — bolš za 12 tysiačaŭ, što dazvolić Zachadu, jak i ŭ vypadku z HIMARS i NASAMS, zabiaśpiečvać imi Ukrainu rehularna.
Demanstracyja pracy snaradaŭ SMArt. Videa: YouTube
Maksimalnaja dalokaść stralby SMArt składaje kala 30 km i heta na 10-15 km mienš za dalokaść stralby zvyčajnymi i reaktyŭnymi snaradami.
Rasija ciapier nie maje anałahaŭ, jakija b paražali celi z takoj ža nadziejnaściu i dakładnaściu. Najbližejšy pryniaty na ŭzbrajeńnie anałah — snarady «Krasnapol».
Ale jany patrabujuć pastajannaj padśvietki celaŭ łazieram, a heta faktyčna krok nazad, bo dla ich patrabujecca asobny navodčyk, jaki budzie padśviečvać celi. Taksama im ciažka atakavać celi, jakija ruchajucca, i jany mocna zaležać ad nadvorja.