Biełaruskaja śpiavačka i kampazitarka Irena Katvickaja stała pieramožcaj Golden Time Talent
Irena Katvickaja stała pieramožcaj ukrainska-brytanskaha konkursu Golden Time Talent. Jana atrymała dva dypłomy I stupieni — u naminacyjach «Fołk-vakał» i «Kampazitar. Vakalnaja muzyka»
08.07.2022 / 14:21
Meta konkursu Golden Time Talent — pošuk vyklučnych talentaŭ i nadańnie im mahčymaści prademanstravać siabie, piša «Narodnaja Vola».
Admietna, što dla ŭdziełu ŭ hetym pradstaŭničym mižnarodnym tvorčym forumie Irena Katvickaja abrała pieśni ŭ aŭtentyčnym biełaruskim hučańni.
«U naminacyi «Fołk-vakał» ja pradstaŭlała baładu pra kachańnie z Paazierja «Silazieńka», dla naminacyi «Kampazitar» abrała pieśniu sa svajho alboma «Etna Fantazija / Ethno Fantasia», «Viasna». Abiedźvie pieśni ŭ aŭtentyčnym hučańni ja ŭpieršyniu pačuła ŭ archivach Akademii navuk Biełarusi padčas navučańnia ŭ aśpirantury na etnamuzykołaha. Ja vielmi ŭdziačnaja losu za toje, što pačuła i viedaju našy śpievy», — havoryć spadarynia Irena.