Uładalnika sietki kram kaśmietyki z Homiela asudzili na dva hady za «raspalvańnie varožaści»
Homielski abłasny sud 2 žniŭnia asudziŭ uładalnika homielskaj sietki kram kaśmietyki «Krasunia» Paŭła Babčanku da dvuch hadoŭ kałonii ahulnaha režymu. Jaho abvinavacili ŭ raspalvańni rasavaj, nacyjanalnaj, relihijnaj ci inšaj sacyjalnaj varožaści (č. 1 art. 130 Kryminalnaha kodeksa), paviedamlaje «Viasna».
02.08.2022 / 14:58
Sudovy praces vioŭ sudździa Vasil Biahun.
Pavodle aficyjnaj infarmacyi, u vieraśni 2020 hoda Babčonak apublikavaŭ u sacsietcy skrynšot, na jakim byŭ kadr z pratestaŭ u žniŭni 2020 hoda na vulicy Savieckaj u Homieli. Svoj dopis jon supravadziŭ tekstam, u jakim nazvaŭ siłavikoŭ «niedaludźmi» i vykazaŭ nadzieju, što jany «adkažuć za złačynstvy suprać svajho naroda».
U 2021 hodzie mužčyna prachodziŭ pa administracyjnaj spravie «za raspaŭsiudžvańnie infarmacyjnaj pradukcyi, jakaja źmiaščaje zakliki da ekstremisckaj dziejnaści». Tady svaju vinu indyvidualny pradprymalnik pryznaŭ całkam i zapłaciŭ štraf. Ź ciapierašnim abvinavačvańniem hamialčuk pahadziŭsia častkova. Na sudzie jon rastłumačyŭ, što nie mieŭ namieru raspalvać sacyjalnuju varožaść.
Sud pakaraŭ biznesoŭca pazbaŭleńniem voli ŭ kałonii ahulnaha režymu terminam na dva hady.