Фінская OLVI паведамляе пра планы прадаць «Лідскае піва» на працягу года
Холдынг OLVI з Фінляндыі, якому належыць 96,36% акцый «Лідскага піва», плануе прадаць гэты актыў цягам 12 месяцаў. Пра гэта гаворыцца ў справаздачы фінскага холдынгу за першае паўгоддзе 2022 года.
14.08.2022 / 09:08
Для адчужэння патрабуецца дазвол уладаў і антыманапольнага органа, што з'яўляецца двума асобнымі працэсамі. Адзначаецца, што ў беларускіх уладаў ёсць пераважнае права пры набыцці кампаніі. Кампанія дадала, што ў чэрвені Мінск абвясціў пра дадатковыя абмежаванні на продаж кампаній для акцыянераў з краін, якія ўводзілі санкцыі.
«Нягледзячы на новыя абмежаванні, кіраўніцтва кампаніі лічыць, грунтуючыся на наяўнай цяпер інфармацыі і перамовах, праведзеных з мясцовымі ўладамі, што магчыма ажыццявіць адчужэнне ў адпаведнасці з раней вызначаным 12-месячным перыядам», — гаворыцца ў справаздачы.
Рашэнне прадаць «Лідскае піва» і спыніць дзейнасць у Беларусі рада дырэктараў OLVI прыняла яшчэ 5 сакавіка, тады ж холдынг спыніў значную частку экспарту ў Расію.
Санкцыі супраць Беларусі ўвялі праз яе пазіцыю па вайне ва Украіне.