Padčas vajskovych vučeńniaŭ pad Lepielem dva snarady palacieli nie tudy
Dniom 18 žniŭnia čytač vydańnia «Zierkało» paviedamiŭ u redakcyju, što ŭ vioscy Bor Lepielskaha rajona Viciebskaj vobłaści ŭpali dva snarady. Niepadalok znachodzicca palihon «Lepielski», dzie jašče na pačatku žniŭnia Minabarony anansavała vajskovyja vučeńni.
18.08.2022 / 17:34
Fota: hazieta «Lepielski kraj»
Pa słovach čytača, adzin sa snaradaŭ upaŭ prosta ŭ viaskovy aharod, druhi — u voziera. Da ščaście, abyšłosia biez paciarpiełych. Na miesca zdareńnia pryjechali milicyja i MNS.
«Zierkału» nie ŭdałosia atrymać apieratyŭny kamientaryj u Minabarony: na nieadnarazovyja zvanki redakcyi pres-sakratar viedamstva Ina Harbačova nie adkazała. U Lepielskim sielsaviecie, da jakoha naležyć vioska Bor, staršynia za niekalki hadzin tak i nie źjaviŭsia na pracoŭnym miescy i nie adkazaŭ na zvanok pa mabilnym.
U pryjomnaj Lepielskaha rajvykankama paviedamili, što nie ŭ kursie zdareńnia: «Z-za vučeńniaŭ mahło niešta strelić, ale vioska znachodzicca terytaryjalna daloka».
Paźniej pres-słužba Minabarony dała aficyjnuju viersiju taho, što adbyłosia. Pavodle jaje infarmacyi, incydent zdaryŭsia padčas kantrolnych zaniatkaŭ pa stralbie artyleryi ŭ vyniku rykašetu. Paviedamlajecca, što padzieńnie adbyłosia «ŭ miežach biaśpiečnaj addalenaści ad bližejšych nasielenych punktaŭ», škody i paciarpiełych niama. Snarady patrapili ŭ voziera i bałota.
Jašče na pačatku žniŭnia Minabarony anansavała apieratyŭna-taktyčnyja vučeńni vojskaŭ VPS i SPA z bajavoj stralboj, jakija buduć prachodzić u Biełarusi i Rasii ŭ dva etapy: z 9 pa 11 žniŭnia — na terytoryi Biełarusi, z 22 pa 25 žniŭnia — u miežach terytoryi i pavietranaj prastory palihona «Ašułuk» u Rasii.
Akramia taho, u Minabarony abviaścili pra taktyčnyja vučeńni 120-j hvardziejskaj asobnaj miechanizavanaj bryhady ŭ Barysaŭskim rajonie Minskaj vobłaści i Lepielskim rajonie Viciebskaj vobłaści. Na vučeńniach źbiralisia adpracavać padrychtoŭku abarončych rubiažoŭ, viadzieńnie raźviedki, pošuk i źniščeńnie dyviersantaŭ, viadzieńnie abarončaha boju, razhrom praciŭnika, jaki ŭkliniŭsia, i praviadzieńnie kontrataki dla adnaŭleńnia zychodnaha stanovišča.
Paźniej kanał manitorynhavaj hrupy «Biełaruski hajun» sa spasyłkaj na hrafik praviadzieńnia mierapryjemstvaŭ na palihonach paviedamiŭ, što termin praviadzieńnia vučeńniaŭ u Biełarusi padaŭžajecca da 20 žniŭnia, u tym liku na palihonie «Lepielski».