«За тыдзень пайшло 3 тысячы рублёў». Беларусы распавялі, колькі выдаткавалі на якасны адпачынак у Беларусі
Гэтым летам туры на мора прыкметна падаражэлі: самая звычайная паездка ў Турцыю на сямʼю лёгка магла пацягнуць на $5 тыс. Тым, у каго ў заначцы не знайшлося такіх сум і хто не хацеў поркацца з шэнгенскімі візамі, прыйшлося правесці водпуск дома. Колькі каштавала задавальненне падыхаць хвоямі і пакарміць камароў? Беларусы падзяліліся бюджэтам паездкі з Onliner.
24.08.2022 / 21:43
«Ездзіла ў санаторый адна, за восем дзён выдаткавала 3 тысячы рублёў»
Ірына — кіраўніца ў сферы адукацыі. Яна не раз адпачывала ў гатэлях Турцыі і Егіпта, ездзіла ў Італію, Грэцыю, Чарнагорыю, Францыю. У гэтым годзе хацела адкрыць для сябе Грузію, але з водпускам усё пайшло не па плане. У апошні момант прыйшлося шукаць замену ў Беларусі.
— Я даўно хацела зʼездзіць на экскурсію ў які-небудзь санаторый, паглядзець, што гэта такое. У жніўні шмат куды пуцёўкі ўжо раскупілі. А вось у «Альфа-Радоне» месцы былі. Наколькі я зразумела, гэта дастаткова дарагі санаторый па беларускіх мерках, дзень адпачынку каштуе ў сярэднім 300 рублёў з чалавека. Але кошт можна рэгуляваць — залежыць ад таго, ці патрэбен увесь комплекс працэдур.
Калі аздараўляцца, то па поўнай праграме, вырашыла Ірына і ўзяла комплексную пуцёўку. За восем дзён аддала 2753 рублі — сюды былі ўключаныя пражыванне, харчаванне, агляд тэрапеўта, неўрапатолага і прызначанае лячэнне. У дадатак беларуска купіла некалькі працэдур тыпу «карбоксітэрапіі» — па 35-40 рублёў. Разам з пакупкамі ў бары (кава, віно, марожанае) бюджэт тыднёвай паездкі на аднаго чалавека выліўся ў 3 тысячы рублёў.
— Мне ўсё вельмі спадабалася, нават у Турцыі ў апошнія разы не было так добра. Вось нядаўна знаёмая лётала: кажа, якасць абслугоўвання ў туркаў упала, шведскі стол не такі багаты, прыбіраюць нерэгулярна. А ў мяне прыбіралі кожны дзень, раз на тры дні мянялі пасцельную бялізну, кожны дзень — ручнікі. Па прыездзе на парозе мяне сустрэлі, занеслі багаж. У гадзіну я была на рэсэпшэне, а ў дзве — ужо на прыёме ў тэрапеўта. Сэрвіс на вельмі высокім узроўні.
Што яшчэ такога асаблівага прапануюць у санаторыі за 300 рублёў за дзень? Ірына з захапленнем апісвае тэрыторыю комплексу (хоць бывалых падарожнікаў наўрад ці можна здзівіць газонам, лаўкамі і кветнікамі). Харчаванню беларуска таксама гатовая спяваць оды.
— У Турцыі недзе праз тыдзень кухня неяк надакучвае, і ты разумееш, што гэта не твая ежа. А тут прыходзіш, бачыш родныя дранікі ці калдуны, і настрой падымаецца. Шмат гародніны і садавіны, балеі з фундуком, міндалем і іншымі арэхамі, мёд, джэмы на выбар, піялы з дурніцамі (я проста абʼелася імі), шашлык і рыба на мангале, італьянскі куток, дзе робяць самую розную пасту, розныя фітачаі… разнастайная кухня.
Цяпер пра мінусы. Па словах Ірыны, купацца ў санаторыі асабліва няма дзе: ёсць рэчка, але яна дробная і глеістая.
Але ёсць басейн. Ірына любіла прымаць ванны — гразевыя і заспакойлівыя.
«За тры дні спусціла 1500 рублёў»
У Паліны — майстра па перманенце і ўладальніцы свайго салона — сёлета не было класічнага летняга адпачынку. Звычайна яна ляціць з Беларусі ў несезон — гэтай зімой, напрыклад, была ў Дубаі. У кастрычніку-лістападзе плануе яшчэ куды-небудзь злётаць, а пакуль паспрабавала на смак «лакшары-адпачынак па-беларуску».
— У жніўні мне тэрмінова трэба было куды-небудзь зʼездзіць, развеяцца. Я разглядала «Шале Грынвуд» (Брэст), парк-гатэль «Кронан» (Гродна), але дзень у дзень атрымалася знайсці нумар толькі ў «Чырвоным Бары» — я так разумею, вольныя месцы былі з-за кошту: усё ж для Беларусі там задорага, — смяецца дзяўчына.
Самы бюджэтны нумар у комплексе каштуе 510 рублёў, мінчанка выбрала варыянт крыху даражэйшы — за 580 (ёсць таксама нумары коштам больш за тысячу рублёў). Адпачывала Паліна з панядзелка па сераду і за дзве ночы і тры дні заплаціла 1160 рублёў. З віном і харчаваннем паездка абышлася ў 1500 рублёў. Колькі каштавалі б 7-10 дзён водпуску, дзяўчына стараецца не думаць — кажа, што ёй для перазагрузкі хапіла і некалькіх сутак.
— Раней у Турцыю я лётала на пяць дзён за тыя грошы, што выдаткавала цяпер. Але ў цэлым пра адпачынак не шкадую, мне ўсё спадабалася. Домікі быццам бы занятыя, але людзей няшмат — ты ўвесь час знаходзішся ў цішыні і камфорце. Вельмі прыгожая тэрыторыя, ёсць дзе пагуляць з сабакам (а з жывёламі пускаюць не ўсюды). У нумарах усё зроблена з натуральных матэрыялаў — гэта на аматара, вядома, але выглядае інтэрʼер атмасферна. Белыя халаты, штодзённае прыбіранне — усё прысутнічае.
За 580 рублёў на суткі з ежы Паліне прапанавалі толькі сняданкі. Што ў іх асаблівага?
— Былі чырвоная ікра, вугор, гатавалі блінцы і амлеты, падавалі самую розную садавіну і гародніну — магу сказаць, што гэта самыя шыкоўныя сняданкі з усіх гатэляў, дзе я была. На абед і вячэру я заказвала стравы ў рэстаране, кошты мне падаліся вышэйшымі за сярэднія. Халаднік, напрыклад, каштаваў 12 рублёў, гарачае — 30—40 рублёў, затое там можна пакаштаваць дзічыну, напрыклад, аленіну.
На сайце напісана, што комплекс гатовы прыняць «самых патрабавальных гасцей». Паліна пераканалася ў гэтым, калі знайшла на тэрыторыі верталётную пляцоўку.
— Я бачыла, што ўвесь час нехта прылятаў. Я гэтым людзям зайздросціла, калі шчыра, таму што ў мяне дарога з Мінска да комплекса заняла чатыры гадзіны, і вельмі хацелася, каб назад хто-небудзь эвакуяваў, — усміхаецца Паліна. — Наогул, мне падалося, што адпачывае ў такіх комплексах нейкая беларуская эліта, тут можна ад усіх схавацца. Ёсць і замежнікі: я чула англійскую мову.
Па словах Паліны, другі раз такія грошы на адпачынак у Беларусі яна б марнаваць не стала: ёсць годныя комплексы і таннейшыя. Але тут галоўнае правіла — планаваць паездку загадзя. Самыя аптымальныя па кошце варыянты разлятаюцца вельмі хутка.
«Тыднёвая пуцёўка на дваіх з дзіцём каштавала 1900 рублёў»
Пуцёўка прадугледжвала трохразовае харчаванне, наведванне басейна, агляд лекара і прызначаныя ім працэдуры. У выніку ўсе дні былі распісаныя: Ірына рэгулярна хадзіла на масаж, у тым ліку «сухі» і тэрмамеханічны, ляжала ў спецыяльнай капсуле пад складанай назвай «магнітатурбатрон», лячылася граззю і прымала «жамчужныя ванны».
Па словах беларускі, такі фармат адпачынку падыходзіць ёй на 100% — на моры апошні раз яна была 10 гадоў таму і зусім ад гэтага не пакутуе.
— На мой погляд, мора — гэта для тых, хто любіць пасіўны адпачынак. А ў нас было шмат працэдур — там настолькі шчыльны графік, што вызваляешся толькі вечарам. Яшчэ я, мусіць, проста не люблю спякоту… Мне трэба, каб паветра было свежае — як у гэтым санаторыі. Там жа ўсё патанае ў хвоях, асабіста для мяне гэта важна.
Ірына з тых, хто клапоціцца пра летні адпачынак загадзя — усё таму, што яна заўсёды браніруе адзін і той жа санаторый на Нарачы. У гэтым годзе ў «Спадарожніку» была ўжо пяты раз, адпачывала з 7-гадовым дзіцём.
— Поўная пуцёўка на дваіх абышлася нам у 1900 рублёў. Для дарослага аздараўленне каштуе нешта каля 150 рублёў за дзень, для дзяцей, здаецца, на 30 рублёў танней. Жылі мы ў аднамесным нумары, але там ёсць двухспальны ложак і крэсла-ложак, таму нам з сынам было цалкам камфортна. Душавая, халадзільнік, чайнік, сейф — у нумары ўсё ёсць.
Па харчаванні нічога з разраду «ваў» у санаторыі не прапаноўвалі, але галоднымі Ірына з сынам сябе сапраўды не адчувалі.
— Кожны дзень вам даюць ліст, у якім трэба адзначыць, што вы будзеце есці на сняданак, абед і вячэру. На выбар ідуць па тры-чатыры пазіцыі. У асноўным прапануюць стравы беларускай кухні: якое-небудзь мяса як асноўную страву, а на гарнір пюрэ, гародніну, макароны. Кашы на выбар, салаты вітамінныя і з маянэзам. Дадаткова нічога з ежы купляць мне не прыйшлося.
Пытаемся ў Ірыны, ці не нудна ёй кожны год ездзіць у адзін і той жа санаторый (у наступным годзе яна мае намер зноў купляць пуцёўку туды).
— Там шмат забаў: ёсць летні амфітэатр, дзе праходзяць канцэрты, ёсць дыскатэка — дзіцяці падабаецца танцаваць. Мы з сынам любім хадзіць пешшу ў пасёлак Нарач, можна браць напракат ровары ці самакаты, раніцай хадзіць на дыхальную гімнастыку ці ў спа (за асобную плату). Я б нават на 14 дзён ездзіла, проста сёлета змагла выдзеліць на санаторый толькі адзін тыдзень.
«За шэсць дзён выдаткавалі 1000 рублёў — любім Браславы»
Уладзіслаў — яшчэ адзін вялікі знаўца беларускай прыроды. На Браслаўскія азёры летам ён ездзіць з сямʼёй ужо сёмы год запар.
— З пачаткам пандэміі за мяжу нам неяк зусім не хочацца: то турысты недзе захраснуць, то неба закрыюць. Мы пакуль устрымліваемся ад паездак. Тым больш што ёсць Браславы, дзе найчысцейшыя азёры, выдатны лес, на мой погляд, вельмі годныя месцы для адпачынку.
У гэтым годзе сямʼя адпачывала на Браславах шэсць дзён. Знайшлі аграсядзібу «Добрамысл» недалёка ад возера за $40 на суткі — кошт адносна невысокі для такога месца. Некаторыя катэджы там прапануюць за $100-150 на суткі.
— У гэтай сядзібе мы праводзім адпачынак апошнія два гады — у мінулым годзе зʼязджалі і адразу забраніравалі яе на наступны год. Месца добрае: побач спуск у ваду, ёсць свая тэрыторыя, дзе стаяць шэзлонгі — можна пазагараць. Нацягнутая сетка для валейбола, можна пагуляць у бадмінтон, футбол, рыбу палавіць, пакатацца на лодцы, катамаранах — сумна нам не было абсалютна. Дзеці ўвогуле цэлы дзень на вуліцы — купаліся ў колах, ім вельмі спадабалася. Яшчэ мы ездзілі ў Браслаў пагуляць, там для дзяцей добры пясчаны пляж.
Прадуктамі закупляліся ў Мінску і гатавалі абеды-вячэры ў асноўным самі. Усяго на харчаванне, арэнду, паліва, сродкі ад камароў і іншыя дробязі выдаткавалі 1000 рублёў. Такую суму лёгка дастаць з бягучых даходаў, і водпуск не прабівае дзірку ў бюджэце, пералічвае плюсы Браслаўскіх азёр Уладзіслаў.
— Няўжо на моры ці ў горы зусім не хочацца?
— Мы некалькі разоў былі ў Турцыі. Першы раз паехалі, таму што ўсе лётаюць, трэба паспрабаваць. Не магу сказаць, што ўражанні былі нейкія моцныя. Марское паветра — гэта, вядома, супер, але беларуская прырода нам таксама падабаецца. Параўноўваць прыгажосць Браслаўскага краю з Турцыяй мне складана.
Колькі ашчадзілі беларусы, якія засталіся дома?
У гэтым сезоне кошты на туры былі вельмі дынамічнымі: на раннім браніраванні ў студзені-лютым можна было ашчадзіць да 40%. І вось тады ў 3 тысячы рублёў (€1175) за добры гатэль з сістэмай «усё ўключана» цалкам можна было ўпісацца, лічыць турагент Ганна Атаманчук. У жніўні шанцаў паляцець у Турцыю па кошце пуцёўкі ў родны беларускі санаторый ужо не засталося.
— Узімку можна было знайсці варыянты па €600 з чалавека — у бюджэтным гатэлі за сем начэй — і па €800 у нядрэннай «пяцёрцы» — гэта кошт за пражыванне ў двухмесным нумары. Калі ляцець аднаму, то мінімальная цана бюджэтнага гатэля стартавала ад €800.
Улетку Турцыя ўжо прыкметна падаражэла. Гарачых тураў не было, наадварот, перад вылетам кошты павышаліся. Тыя, хто плануе водпуск у апошні момант, плацяць ужо мінімум па €900—1000 з чалавека за размяшчэнне ў двухмесным нумары. А для турыстаў, якія ляцяць адныя, туры каштуюць ад €1500, і гэта гатэлі далёка не самага высокага ўзроўню.