Міністр Пярцоў сабраўся ствараць «медыяхолдынгі» ў кожнай з абласцей
Лукашэнкаўцы працягваюць думаць, што рабіць з раёнкамі. Новая ідэя — ствараць медыяхолдынгі па прыкладзе «Мінскай праўды». Пра гэта заявіў міністр інфармацыі Уладзімір Пярцоў.
27.08.2022 / 13:02
— Гэта вопыт перадавы. Гэта вопыт, па якім зараз пойдуць усе вобласці. Усе ўжо прыйшлі да высновы, што сёння гэта адзіная магчымасць утрымаць ва ўмовах трансфармацыі аўдыторыю сваіх раёнаў, — сказаў міністр, адзначыўшы, што маладыя людзі атрымліваюць цяпер інфармацыю з гаджэтаў, а не з газет.
Чытайце таксама:
Касцёл у Беларусі асудзіў публікацыю ў газеце «Мінская праўда» і расцэньвае яе як распальванне варожасці
Пасля скандальнай вокладкі «Мінскай праўды» пасол Ватыкана сустрэўся з Макеем
Як праўладная «Мінская праўда» крадзе артыкулы «Нашай Нівы»
Калі ў чэрвені Пярцоў заяўляў, што ў раёнках няма крытычных матэрыялаў, то праз два за паловай месяцы міністр адзначыў, што такія тэксты — не самамэта.
— Ніхто не настройвае ісці і капаць, вышукваць нейкую драбнатэмнасць, «смажаныя факты», каб прама ачарніць чыноўнікаў на месцах. Наадварот, узаемадзеянне рэдакцыі і выканаўчай улады, калі начальнік любога аддзела нават не паспрабуе адмовіць. Паступіў сігнал трывогі — лямпачка, бардзюр, дарога, садок, — адразу ж выязджаем туды. Начальнік аддзела ці спецыяліст на месцы кажа, што так, ёсць праблема, але мы заасфальтуем ямку ў гэтым ці наступным месяцы. Усё, нарыў зняты.
Сёлета неаднаразова падымалася пытанне эканамічнай неэфектыўнасці дзяржаўных СМІ. Пасля пачатку вайны ва Украіне сыход замежных кампаній з Беларусі значна зменшыў рэкламныя даходы тэлеканалаў і медыя, таму ў Беларусі прыдумалі новы збор для ўсіх рэкламадаўцаў, які ідзе на падтрымку дзяржСМІ.
У інфармацыйнай частцы канкурэнцыю незалежным медыя (якія выціснулі з краіны і прызналі па-за законам) дзяржаўныя не могуць скласці і блізка.