Prakuror zaprasiŭ pa spravie pravaabaroncy Marfy Rabkovaj i jašče 9 palitviaźniaŭ 94 hady na ŭsich
Žurnalistka Jaŭhienija Doŭhaja ŭ svaim telehram-kanale sa spasyłkaj na list palitviaźnia Akichiry Hajeŭskaha-Chanady paviedamiła, jakija terminy zaprasiŭ prakuror pa spravie pravaabaroncy «Viasny» Marfy Rabkovaj i jašče dzieviaci palitviaźniaŭ. Ahułam na ŭsich — 94 hady pazbaŭleńnia voli.
05.09.2022 / 22:35
Zakryty sud pa hetaj hučnaj spravie idzie z krasavika, na łavie padsudnych dziesiać palitźniavolenych — kaardynatarkaj Vałanciorskaj słužby «Viasny» Marfa Rabkova, vałancior Andrej Čapiuk, palitźniavolenyja aktyvisty anarchisckaha ruchu Akichira Hajeŭski-Chanada, Alaksandr Franckievič, Alaksiej Hałaŭko, Alaksandr Kaźlanka, Pavieł Špietny, Mikita Draniec, Andrej Marač, Daniła Čul. Ahułam, u hetaj spravie fihurujuć 10 artykułaŭ Kryminalnaha kodeksa, a materyjały kryminalnaj spravy składajuć 160 tamoŭ.
Śledstva śćviardžaje, što z 2005 pa 2020 hod nieŭstanoŭlenyja asoby pry ŭdziele 31-hadovaha anarchista Alaksandra Franckieviča i 26-hadovaj pravaabaroncy Marfy Rabkovaj abjadnali «šerah arhanizavanych złačynnych hrup»: «Revalucyjnaje dziejańnie», «Narodnaja samaabarona» i «Rievolucijna dija». Hetyja abjadnańni, pa viersii śledstva, uvajšli ŭ skład «mižnarodnaj złačynnaj arhanizacyi» u jakaści jaje strukturnych padraździaleńniaŭ. Franckievič i Rabkova nibyta, jak śćviardžaje śledstva, byli arhanizatarami padpału padatkovaj inśpiekcyi Homielskaha rajona ŭ sakaviku 2017 hoda z vykarystańniem «kaktejlaŭ Mołatava».
Prakuror zaprasiŭ dla padsudnych:
- Alaksandr Franckievič — 17 hadoŭ;
- Akichira Hajeŭski-Chanada — 16 hadoŭ;
- Marfa Rabkova — 15 hadoŭ;
- Alaksiej Hałaŭko — 12 hadoŭ;
- Pavieł Špietny, Mikita Draniec, Alaksandr Kaźlanka, Andrej Čapiuk — pa 6 hadoŭ;
- Andrej Marač, Daniła Čul — pa 5 hadoŭ.
Prysud pa hetaj spravie zaŭtra ŭ Minharsudzie a 15-j hadzinie ahučyć sudździa Raman Biziuk.