U Minsku cełuju siamju asudzili za ŭdzieł u Maršach. Ich znajšli pa fatahrafijach
Minski sud Leninskaha rajona 26 žniŭnia asudziŭ cełuju siamju za ŭdzieł u akcyjach pratestu ŭ 2020 hodzie na padstavie fota i pierapiski ŭ sacsietkach. Pa artykule ab «hrubym parušeńni hramadskaha paradku» muža i žonki Alenu i Andreja Barmutaŭ, a taksama siastru mužčyny Volhu Rachubu asudzili da troch hadoŭ «chatniaj chimii» kožnaha, paviedamlaje «Viasna».
13.09.2022 / 14:05
Barmutaŭ abvinavacili ŭ tym, što jany błakavali vulicy na troch maršach pratestu, a siastru Andreja Volhu Rachubu — u anałahičnym epizodzie, ale tolki na adnoj akcyi.
Usie troje pryznali vinu častkova. Pa słovach Andreja Barmuty, jon «nie viedaŭ, što masavyja mierapryjemstvy, va ŭdziele ŭ jakich jaho abvinavačvajuć, zjaŭlajucca niesankcyjanavanymi». Volha Rachuba, jakaja pracuje redaktaram, raspaviała, što pryjechała da miesca praviadzieńnia maršu «z pryčyny prafiesijnaj cikavaści».
U asnovu abvinavačvańnia lahli zroblenyja na maršach fatahrafii. Svajaki nie nadavali im vialikaha značeńnia, pierasyłali adzin adnamu i abmiarkoŭvali ŭ sacsietkach.
Akramia taho, dziaržabvinavaŭca ŭ intaresach KTUP «Minsktrans» zajaviŭ isk ab kampiensacyi majomasnaj škody, nibyta naniesienaj złačynstvam, — jon maje namier spahnać z abvinavačanych u salidarnym paradku 28340 rubloŭ 31 kapiejku.
Da suda minčuki znachodzilisia na voli pad zakładam. U Aleny i Andreja Barmutaŭ dvoje dziaciej: adno dzicia — maleńkaje, inšaje — niepaŭnaletniaje. Dzieci jość i ŭ Volhi Rachuby.
Suddzia Jułija Inčyna pryznała muža i žonku Barmutaŭ i Volhu Rachubu vinavatymi pavodle č. 1 art. 342 KK (udzieł u hrupavych dziejańniach, jakija hruba parušajuć hramadski paradak) i asudziła kožnaha ź ich da «chatniaj chimii» na try hady.